एटलेटिकोको एकेडेमी रियल र बार्सिलोनाको भन्दा राम्रो

काठमाडौं । पछिल्लो समय एटलेटिको म्याड्रिड एउटा क्लबका रूपमा झन झन बलियो हुँदैछ । त्यसकै कारणले त हो, उसको एकेडेमी पनि उत्तिकै झन झन बलियो हुँदैछ ।

यो एकेडेमीले लगातार एकपछि अर्को राम्रा खेलाडी उत्पादन गरिरहेको छ । नतिजा यो एकेडेमीले स्पेनी फुटबलमा सबैभन्दा बढी कमाउने भएको छ, रियल म्याड्रिड र बार्सिलोनाको एकेडेमी भन्दा पनि बढी ।

हालै एउटा नयाँ सर्वेक्षण गरिएको छ र त्यस अनुसार सन् २०१० यता एकेडेमीबाट सबैभन्दा बढी कमाउने कुनै स्पेनी क्लब छ भने त्यो एटलेटिको नै अगाडि हो ।

समग्र युरोपेली क्लब फुटबलको कुरा गर्ने हो भने उसको अगाडि खालि एउटै अर्को क्लब रहेको छ र त्यो हो, आयाक्स । यो डच क्लब त नयाँ राम्रा खेलाडी उत्पादन गरेर बेच्नेमा माहिर छ ।

त्यस सर्वेक्षण अनुसार एटलेटिकोले सन् २०१० यता एकेडेमीका खेलाडी बेचेर मात्र २१ करोड ४२ हजार युरो भन्दा बढी कमाएको छ ।

कुनै पनि क्लबका लागि यतिको रकम धेरै हो । त्यसपछि बढी कमाउने स्पेनी क्लबमा क्रमश: बार्सिलोना, रियल सोसिडाड, लास पाल्मास र रायो भाल्कानो रहेका छन् ।

समग्रमा कुरा गर्दा आयाक्सले यही समयमा २४ करोड ७७ लाख युरो भन्दा बढी कमायो । आयाक्सपछि यसमा आउने एटलेटिको नै भयो ।

त्यसपछि एकेडेमीका खेलाडी बेचेर बढी कमाउने अन्य क्लबमा बेनफिका, मोनाका र साल्का ०४ रहेका छन् । रमाइलो के भने एकेडेमीका खेलाडी उत्पादन गर्ने काममा इंग्लिस प्रिमियर लिगका क्लब धेरै पछाडि छन् ।

–मार्काको सहयोगमा ।