एनफिल्ड छाडेर अन्यत्र जानु किन डरलाग्दो ?

काठमाडौं । इंग्लिस प्रिमियर लिग क्लब लिभरपुल धेरै खेलाडीका लागि सबैभन्दा आकर्षक गन्तव्य हुन सक्छ, आखिरमा यो समग्र विश्व फुटबलमै सबैभन्दा लोकप्रिय र सफल क्लबमध्ये एक हो ।

तर,यस्ता केही खेलाडी पनि छन्, जसले लिभरपुल छाडेर अन्यत्र जाने खोजे । तर पछिल्लो समय यस्ता केही उदारहण बनेका छन, जसले भन्छ, एनफिल्ड छाड्नु गलत निर्णय हुन सक्छ ।

यसै सिजन मात्र डच खेलाडी गिनी विज्नाल्डम लिभरपुल छाडेर पेरिस सेन्ट जर्मेन (पीएसजी) गए । लिभरपुल रहेको बेला उनी क्लबका प्रमुख खेलाडी थिए, नियमित सुरुदेखि खेल्थे । तर पीएसजी गएयता उनी हराए जस्तै भएका छन् । एक त उनले राम्रो खेल्न सकेका छैनन्, त्यसैले टिमबाट नियमित खेल्न पनि पाइरहेका छन् ।

दोस्रो, उनी पीएसजीका अन्य खेलाडीमाझ अलोकप्रिय पनि रहेका छन् । यस अगाडि फिलिपे कोउटिन्होले पनि लिभरपुल छाड्न निकै जिद्दी गरे । लिभरपुलले उनलाई फकाउन के मात्र गरेनन्, तर हार खाएर बार्सिलोनालाई बेचे ।

बार्सिलोना गएयता कोउटिन्हो पनि असफल सावित भए, नतिजा उनी क्लबकै लागि बोझ भएका छन् ।

यसैक्रममा उनलाई ऋणमा बायर्न म्युनिक पनि पठाइयो । अहिले फेरि बार्सिलोनामै छन् र क्लबका लागि कुनै गतिलो योगदान दिन सकिरहेका छैनन् ।

यस्तोमा प्रश्न उठ्न थालेको छ, एनफिल्ड छाडेर अन्यत्र जानु किन डरलाग्दो हुने गर्छ ?

यो त खालि संयोग मात्र हुन सक्छ, तर यसले पक्कै पनि खेलाडीलाई एनफिल्ड छाड्न अगाडि दुई पल्ट सोच्न बाध्य पार्नेछ ।