अपमान भएको भन्दै कमरानले पिएसएल नखेल्ने 

काठमाडौं । आफ्नो अपमान भएको भन्दै पाकिस्तानका विकेटविकपर ब्याट्सम्यान कमरान अकमलले यस सिजनको पाकिस्तान सुपर लिग (पिएसएल) नखेल्ने भएका छन् ।

आईतबार भएको ड्राफ्टमा सबैभन्दा तल्लो श्रेणीमा छनोट भएपछि अकमलले आगामी वर्ष हुने पिएसएल नखेल्ने भएका हुन् ।

पेशावर जल्मीले उनलाई सबैभन्दा तल्लो श्रेणीमा छनोट गरेको हो । 

अकमललाई डायमन्ड श्रेणीबाट गोल्ड श्रेणीमा झारिएको थियो तर पेशावरले उनलाई सिल्भर श्रेणीबाट टिममा भित्र्याएको थियो । 

अकमलले आफूले उक्त अपमानसहित खेल्न नसक्ने बताएका छन् ।

अकमल पिएसएलमा सबैभन्दा बढी खेल खेल्ने खेलाडी तथा सर्वाधिक रन बनाउनेमा दोस्रो स्थानमा रहेका छन् ।

अकमलले ६९ खेलमा १ हजार ८ सय २० रन जोडेका छन् । बाबर आजमले भने ५८ खेलमा २ हजार ७० रन जोडेका छन् ।