कप्तान ज्ञानेन्द्रसहित चार खेलाडीलाई कारवाही गर्ने तयारी 

काठमाडौं । नेपाल क्रिकेट संघ (क्यान)को खेलाडी अनुशासन छानविन समितिले राष्ट्रिय टिमका कप्तान ज्ञानेन्द्र मल्लसहित चार खेलाडीलाई कारवाही गर्नुपर्ने आशयसहितको प्रतिवेदन बोर्डमा पठाउने भएको छ । 

कार्यवाहक सचिव प्रशान्त बिक्रम मल्लको संयोजकत्वमा गठिन पाँच सदस्यीय समितिले कप्तान मल्लसहित उपकप्तान दिपेन्द्रसिंह ऐरी, सोमपाल कामी र कमलसिंह ऐरीलाई कारवाही गर्नुपर्ने आशय प्रतिवदेनमा उल्लेख गरेको छ । 

खेलाडीहरुले केन्द्रिय सम्झौता (सेन्ट्रल कन्ट्रयाक्ट)को विषयमा क्यानसँगको सम्झौता विपरित सञ्चारमाध्यममा अभिव्यक्ति दिएको भन्दै उक्त समितिले चारै जना खेलाडीहरुसँग स्पष्टीकरण माग गरेको थियो । 

‘तर खेलाडीहरुले उल्टै क्यानसँग ११ बुँदे माग अघि सार्दै क्यानलाई अव्यवहारिक रुपले चेतावनीसहितको जवाफ फर्काएका थिए । उनीहरुले सञ्चारमाध्यमा दिएको अभिव्यक्तिप्रति कुनै आत्मग्लानी नरहेको भाव अनुसारको जवाफ क्यानमा फर्काएका थिए,’ क्यान स्रोतले भन्यो । 

स्रोतका अनुसार खेलाडीहरुलाई दोस्रो पटक मौका दिदा पनि उनीहरुले सञ्चारमाध्यममा दिएको उक्त अभिव्यक्तिप्रति कुनै गल्ती स्वीकार गरेनन ।

‘स्पष्टीकरणबाट हाम्रो चित्त बुझेको छैन । खासमा उनीहरुमा क्यानप्रति कुनै उत्तरदायित्व बोध भएको छैन । क्यानप्रति कुनै जिम्मेवारीपन पनि बोध भएको छैन । र यसै आधारमा हामीले क्यानको बोर्डमा प्रतिवेदन बुझाउने तयारी गरेका छौ ।’

आईसीसी टी–ट्वान्टी ग्लोवल छनोट मुखैमा आइपुग्दा खेलाडीहरुबारे नकारात्मक प्रतिवेदनले असर गर्ने त होइन भन्ने प्रश्नको जवाफमा क्यान स्रोतले कसैले अपराध गरे उसलाई छनोटको बहानामा माफि नदिइने स्पष्ट पारे । 

समितिले तयार गरेको प्रतिवेदनमा कप्तान ज्ञानेन्द्र मल्ललाई सबैभन्दा बढी जिम्मेवार ठहर्याइएको छ । 

‘कप्तानको रुपमा मल्लको जिम्मेवारी बढी हुन्छ । कप्तानले खेलाडीहरुलाई हस्ताक्षर गराए तथा खेलाडीहरुले किन र कुन बाध्यतामा हस्ताक्षर गरे थाहा भएन,’ स्रोतले भन्यो । 

‘प्रतिवेदनमा कारवाहीको सिफारिस भन्दा पनि यस्ता कुराहरु समेटिएको छ । र हामीले प्रतिवेदनको आधारमा कारवाही अगाडी बढाउनुपर्ने भनेका छौ ।’ 

स्रोतका अनुसार प्रतिवेदनमा खेलाडीहरुको बारेमा केही पनि सकारात्मक कुरा उल्लेख गरिएको छैन ।

‘प्रतिवेदनमा खेलाडीहरुबारे सकारात्मक कुराहरु केही पनि छैन । सकारात्मक उनीहरुले केही गरेकै छैनन ।’

समितिमा संयोजक मल्लसहित कोषाध्यक्ष रोशन कुमार सिंह, महाप्रवन्धक रौनक मल्ल र क्रिकेट म्यानेजर विनोद दास रहेका छन् ।

समितिले आईतबार नै बोर्डलाई प्रतिवेदन बुझाउने तयारी गरेकोछ ।