काठमाडौं । अन्तर्राष्ट्रिय क्रिकेट परिषद् (आईसीसी) ले आगामी वर्ष अष्ट्रेलियामा हुने आईसीसी टी–ट्वान्टी विश्वकपको पूर्ण खेल तालिका जनवरीमा घोषणा गरिने जनाएको छ ।
आईसीसीका अनुसार जनवरी २१ मा विश्वकपको पूर्ण खेल तालिका घोषणा गरिनेछ ।
अष्ट्रेलियाको विभिन्न ७ स्थानमा अक्टुबर १६ देखि नोभेम्बर १३ सम्म हुने विश्वकप अन्तर्गत जम्मा ४५ खेल हुनेछन् ।
विश्वकपका खेलहरु एडिलेड, ब्रिसबेन, गिलोङ, होवार्ट, मेलवर्न, पर्थ र सिड्नीमा खेलाइनेछ ।
फाइनल नोभेम्बर १३ मा मेलवर्न क्रिकेट ग्राउन्डमा हुनेछ ।
विश्वकपको टिकट बिक्री भने फेब्रुअरी ७ बाट खुल्ला गरिनेछ ।
विश्वकपमा सन् २०२१ को विजेता अष्ट्रेलिया, उपविजेता न्यूजिल्यान्ड, अफगानिस्तान, बंगलादेश, इंग्ल्यान्ड, भारत, पाकिस्तान र दक्षिण अफ्रिकाले सिधै सुपर १२ मा स्थान पक्का गरिसकेका छन् ।
त्यसैगरी, नामिविया, स्कटल्यान्ड, श्रीलंका र वेस्ट इन्डिजले पहिलो चरणको खेल खेल्नुपर्नेछ ।
बाँकी ४ टोली भने ग्लोबल छनोटबाट आउनेछन् ।
