सितालाई क्विन्सले एजेन्सी सेवा दिने  

काठमाडौं । क्विन्स इभेन्ट मेनेजमेन्ट प्रा लिले नेपाली राष्ट्रिय महिला क्रिकेट टिमकी उपकप्तान सिता राना मगरलाई एजेन्सी सेवा प्रदान गर्ने भएको छ । 

काठमाडौंमा आज सनिबार आयोजित कार्यक्रमकाबीच क्विन्स इभेन्ट र सिताबीच सम्झौतामा हस्ताक्षर भएको हो । 

सम्झौता अनुसार क्विन्स इभेन्टले सितालाई एजेन्सी सेवा प्रदान गर्नेछ । 

यस अन्तर्गत नेपाली तथा अन्तर्राष्ट्रिय क्षेत्रका व्यावसायिक घराना र अन्य ब्राण्डहरुलाई प्रायोजनका लागि खेलाडीसम्म जोडाउने काम क्विन्स इभेन्टले गर्नेछ । 

यस्तै देशबाहिर आयोजना हुने महिला क्रिकेट प्रतियोगिता र फ्रेन्चाइज लिगहरुमा खेलाडीको सहभागिताका लागि आवश्यक पहल र व्यवस्थापन समेत क्विन्स इभेन्टले गर्नेछ । 

नेपाली राष्ट्रिय महिला क्रिकेट टिमकी उपकप्तान सिताले सन् २००७ मा नेपालका लागि अन्तर्राष्ट्रिय क्रिकेटमा डेब्यु गरेकी थिइन् ।

क्विन्स इभेन्टले पोखरा प्रिमियर लिगका दुई संस्करण तथा वुमेन च्याम्पियन्स लिगको पहिलो संस्करण आयोजना गरिसकेको छ ।