स्पष्टीकरणको ‘वार’

काठमाडौं । गत बुधबार नेपाल क्रिकेट संघ (क्यान)ले दोस्रो पटक खेलाडीसँग स्पष्टीकरण माग गर्यो । पहिलो स्पष्टीकरण चित्त बुझ्दो नभएको र क्यानलाईनै दोषी करार गरिएको भन्दै क्यानले दोस्रो पटक खेलाडीसँग स्पष्टीकरण सोधेको हो ।

खेलाडीसँग गरिएको केन्द्रिय सम्झौता चित्त बुझ्दो नभएको भन्दै खेलाडीले मिडियामार्फत असन्तुष्टि जनाएका थिए । त्यही विषयलाई लिएर क्यानले खेलाडीसँग दुई पटक स्पष्टीकरण माग गरिसकेको छ । 

उल्ल्लेखित घटना क्यान र खेलाडीबीच पछिल्लो समय बढ्दै गएको तिक्तता देखाउन पर्याप्त देखिन्छ । क्यानले खेलाडीसँग गर्ने केन्द्रिय सम्झौताको विषयलाई लिएर दुवै पक्षबीचका असन्तुष्टि पछिल्लो समय सञ्चार माध्यममा छताछुल्ल भएका छन् ।

क्यानसँग केन्द्रिय सम्झौताको विषयलाई लिएर खेलाडीहरुले सार्वजनिक रुपमै असन्तुष्टि पोख्दै आएका छन् । क्यानले आफूखुसी सञ्चारमाध्यममा अभिव्यक्ति दिएको भन्दै खेलाडीसँग पटक–पटक स्पष्टीकरणको डण्डा चलाएको छ ।

सञ्चारमाध्यममा विवादास्पद अभिव्यक्ति दिएको भन्दै क्यानले राष्ट्रिय टिमका कप्तान ज्ञानेन्द्र मल्ल, उपकप्तान दीपेन्द्रसिंह ऐरी, सोमपाल कामी र बलर कमलसिंह ऐरीसँग स्पष्टीकरण माग गरेको थियो । प्राप्त स्पष्टीकरण समेत चित्त बुझ्दो नभएको भन्दै क्यानले दोस्रो स्पष्टिकरण पत्र खेलाडीलाई थमाएको छ । पछिल्ला गतिविधिले क्यान र खेलाडीबीचको स्पष्टीकरणको ‘वार’ सतहमा आएको छ ।

क्यानले भने खेलाडीसँग कुनै तिक्तता नरहेको दावी गर्छ ।

क्यानका कार्यवाहक सचिव प्रशान्त विक्रम मल्लले खेलाडीसँग कुनै मतभेद नरहेको दावी गर्छन् । सचिव मल्लका अनुसार क्यानले खेलाडीको हकहित, सेवासुविधा तथा तलबभत्ता बढाउने कुरामा सकारात्मक कदम चालेको छ ।

‘क्यानले राष्ट्रिय तथा अन्तर्राष्ट्रिय क्रिकेट खेल आयोजना गरिरहेकै छ । खेलाडीको सेवासुविधा तथा तलबभत्ता बढाउने कुरामा काम गरिरहेकै छ । यी कामहरु खेलाडीको हकहितमै भैरहेका छन् ।’ सचिव मल्लले खेलपाटीसँग भने ।

खेलाडीले भने क्यानले आफुसँग गरेको केन्द्रिय सम्झौतामा असन्तुष्टि पोखिरहेका छन् । सोही कारण अधिकांश खेलाडीले केन्द्रिय सम्झौतामा हस्ताक्षर गरेका छैनन् । खेलाडीले हस्ताक्षर नगर्दा क्यानले केन्द्रिय सम्झौताको सूचि सार्वजनिक गर्न सकेको छैन ।

क्यानले गत वर्षबाट राष्ट्रिय टिमका खेलाडीलाई वर्गीकरण गर्दै केन्द्रिय सम्झौता दिदै आएको छ । त्यसअघि आईसीसीले यो काम हेर्ने गरेको थियो ।

वर्गीकरण अनुसार  ’ए’  श्रेणीमा पर्ने खेलाडीले मासिक ५० हजार, ’बी’ श्रेणीले ४० हजार र ’सी’ श्रेणीका खेलाडीले ३० हजार पाउँदै आएका छन् ।

यही विषयले पछिल्लो समय क्यान र खेलाडीबीच मतभेद बढाएको छ ।

राष्ट्रिय क्रिकेट टिमका कप्तान ज्ञानेन्द्र मल्लले क्यानसँगको तिक्तता भन्दा पनि क्यानको निर्णयप्रति आफुहरुको असन्तुष्टि रहेको बताउँछन् ।

कप्तान मल्लका अनुसार क्यानले केन्द्रिय सम्झौता गर्नुअघि खेलाडीलाई मापदण्डको बारेमा जानकारी गराउनु पर्नेथियो तर त्यसो गरिएन ।

खेलाडीको ग्रेडिङमा क्यानले आफूखुसी गरेको भन्दै कप्तान मल्लको असन्तुष्टि छ । ओमान सिरिजमा रहेका खेलाडीलाई केन्द्रिय सम्झौतामा समेट्नुपर्ने धारणा कप्तान मल्लले राख्दै आएका छन् ।

‘सम्झौता अघि मापदण्ड तथा ग्रेडिङको बारेमा खेलाडीलाई जानकारी गराईनुपथ्र्यो । तर त्यसो गरिएन ।’ कप्तान मल्लले भने ।

तर क्यानका सचिव मल्लले भने सबै प्रक्रिया पुर्याएर खेलाडीको ग्रेडिङ गरेको र यसमा क्यानको कुनै कमजोरी नरहेको दाबी गर्छन् ।

उनले अहिलेको ग्रेडिङमा कुनै कमजोरी नरहेको दाबी गर्दै असन्तुष्ट खेलाडीलाई अहिलेको सम्झौतामा ल्याउनु अर्को खेलाडीमाथि अन्याय हुने बताए ।

सचिव मल्लले कुनै खेलाडीलाई आफू अन्यायमा परेको भए क्यानमा निवेदन दिनुपर्नेमा आफूखुसी सञ्चारमाध्यममा अभिव्यक्त दिएको आरोप लगाउँछन् ।

‘अन्यायमा परेका खेलाडीले कम्तिमा क्यानमा निवेदन दिन सक्छन् । त्यसपछि पनि सुनुवाई भएन भने अन्य प्रक्रियामा जान सक्छन् । तर आफूखुसी सञ्चारमाध्यममा जानु भनेको क्यानप्रति वफादार नहुनु हो ।’ मल्लले भने ।

कप्तान मल्लले भने क्यान पदाधिकारीसँग फोनमार्फत कुराकानी भएको र त्यसको कुनै निर्णय नआउदै सञ्चारमाध्यमबाट समाचार बाहिरिएको दावी गरे ।

‘क्यान वा कसैलाई बदनाम गराउने उदेश्य थिएन । क्यानलाई बदनाम गर्ने उदेश्यले सञ्चारमाध्यममा अन्तरर्वार्ता दिएका होइनौ ।’ मल्लले भने ।