विश्वकपले जुराउने भारत र पाकिस्तानको भिडन्त  

काठमाडौं । विभिन्न विषयलाई लिएर भारत र पाकिस्तानबीच निरन्तर विवाद चलिरहदाँ यसको असर खेल क्षेत्रमा पनि पर्ने गरेको छ ।

त्यसै कारण पछिल्ला वर्षहरुमा आईसीसीको प्रतियोगिता बाहेक पाकिस्तान र भारतले एकअर्काविरुद्ध क्रिकेट खेल्ने गरेका छैनन्।

सन् २०१९ को एकदिवसीय विश्वकपपछि पाकिस्तान र भारतबीच क्रिकेट भएको छैन । अझ सन् २०१६ पछि टी–ट्वान्टी विश्वकप आयोजना हुन पाँच वर्ष कुर्नुपर्दा यी दुई टोलीबीच खेल हुन सकेको थिएन् ।

तर, आईसीसीले युएई र ओमानमा आयोजना गरिरहेको टी–ट्वान्टी विश्वकपले भने यी दुई टोलीबीचको जम्काभेट गराइदिएको छ ।

अझ भारत र पाकिस्तान एउटै समूहमा मात्र परेका छैनन उनीहरुले टी–ट्वान्टी विश्वकपको यात्रा एकअर्काविरुद्ध खेल्दै सुरुआत गर्नेछन् । सुपर १२ अन्तर्गत समूह २ मा रहेको भारत र पाकिस्तानबीच आइतबार खेल्दैछन् ।

जब भारत र पाकिस्तान विश्वकपको एउटै समूहमा पर्छन, सो खेललाई जहिले पनि अन्य सबै खेलभन्दा बढी प्राथमिकता दिइन्छ । त्यसैको परिणामस्वरुप भारत र पाकिस्तानबीच हुने खेललाई लिएर चर्चा परिचर्चा सुरु भईसकेको छ ।

चिरप्रतिद्धन्दीको रुपमा रहेपनि एकदिवसीय विश्वकप होस वा टी–ट्वान्टी विश्वकप होस पाकिस्तानले भारतलाई पराजित गर्न सकेको छैन ।

पाकिस्तानले भारतविरुद्ध आईसीसीको कुनै प्रतियोगितामा जित निकालेको छ भने त्यो हो च्याम्पियन्स ट्रफी, जसमा पाकिस्तानले तीन पटक जित हात पारेको छ।

पछिल्लो पटक पाकिस्तानले भारतलाई २०१७ को आईसीसी च्याम्पियन्स ट्रफीको फाइनलमा पराजित गरेको थियो।

तर, इतिहास हेर्दा भारतले पाकिस्तानलाई टी–ट्वान्टी विश्वकप अन्तर्गत अहिलेसम्म खेलेका सबै पाँच खेलमा पराजित गरेको छ । यस पटक पाकिस्तानले भारतसँगको हारको यात्रामा पूर्णविराम लगाउनेछ वा छैन भन्ने कुरा हेर्न लायक हुनेछ ।

पाकिस्तानका कप्तान बाबर अजाम भने यस पटक नतिजा आफ्नो पक्षमा हुने कुरामा विश्वस्त छन्।

जसको एउटा कारण हो पाकिस्तानले पछिल्लो एक दशकमा टी–ट्वान्टी क्रिकेटमा राम्रै प्रदर्शन गर्दै आएको छ। उसले खेलेको १ सय २९ मध्ये ७७ खेलमा जित हात पारेको छ। ४५ खेलमा पराजय भोग्दा दुई खेल बराबरीमा टुंगियो भने पाँचवटा खेलको कुनै परिणाम आएन।

यता भारतले भने पछिल्लो एक दशकमा खेलेको ११५ खेलमध्ये ७३ मा जित हात पारेको छ। उसले ३७ खेलमा पराजय भोग्दा तीन खेलमा कुनै परिणाम आएन।

सन् २००७ मा आयोजना भएको पहिलो टी–ट्वान्टी विश्वकपमा पाकिस्तान उपविजेता बन्दा भारत च्याम्पियन बनेको थियो। त्यसैगरी, पाकिस्तान सन् २००९ मा विजेता बनेको थियो।

तर पछिल्ला दुईवटा विश्वकपमा भने पाकिस्तानले खासै राम्रो छाप छाड्न सकेको छैन। सन् २०१६ को विश्वकपमा सुपर १० चरण पार गर्न सकेन । उसले चार मध्ये केवल एक खेल जित्दा तीन खेलमा पराजय भोग्यो । सन् २०१४ मा पनि पाकिस्तान सेमिफाइनल प्रवेश गर्न सकेन्।

अर्कोतर्फ सन् २००७ मा भएको पहिलो विश्वकपको उपाधि उचालेको भारत सन् २०१४ मा उपविजेता तथा सन् २०१६ मा सेमिफाइनलसम्मको यात्रा तय गरेको थियो।

र यस पटक पाकिस्तान र भारतको यात्रा कहाँसम्म हुनेछ भन्ने कुरा यी दुई टोलीबीच हुने पहिलो खेलको नजिताले पनि केही हदसम्म सुनिश्चित गर्नेछ।