नामिबिया पहिलो पटक सुपर १२ मा

काठमाडौं । नामिबिया आईसीसी टी–ट्वान्टी विश्वकप क्रिकेटको सुपर १२ मा प्रवेश गरेको छ ।

यूएईको साहजाहमा शुक्रबार आयरल्याण्डलाई हराउँदै नामिबिया दोस्रो चरणमा पुगेको हो ।

समूह चरणको आफ्नो अन्तिम खेलमा नामिबियाले ८ विकेटको जित निकाल्यो ।

यससँगै नामिबिया इतिहास रच्दै पहिलो पटक विश्वकपको सुपर १२ मा प्रवेश गरेको छ ।

१ सय २६ रनको सामान्य लक्ष्य नामिबियाले ९ बल अगावै २ विकेट गुमाएर पुरा गर्यो ।

नामिबियालाई जित दिलाउन कप्तान गेरहार्ड इरास्मसले ५३ रनको अविजित पारी खेले ।

डेभिड विसेले अविजित २८ रन बनाए । ओपनर क्रेग विलियम्स र जेन ग्रिनले क्रमश १५ र २४ रन बनाएर आउट भए ।

आयरल्याण्डका कर्टिस कापरले दुवै विकेट लिएका थिए ।

यसअघि टस जितेर सुरुवातमा ब्याटिङ गरेको आयरल्याण्डले २० ओभर ८ विकेट गुमाएर १ सय २५ रन बनायो ।

आयरल्याण्डका लागि ओपनर पाउल स्टर्लिङले ३८ रन बनाउनु बाहेक अन्यले उल्लेख्य प्रर्दशन गर्न सकेनन् ।

अर्का ओपनर केभिन डी ब्रोइनले २५ र एन्डी बालबर्नीले २१ रन बनाए । अन्य खेलाडीले दोहोरो अंकको स्कोर समेत छुन सकेनन् ।

नामिबियाका जान फ्रिलिंकले सर्वाधिक ३ विकेट लिए । डेभिड विसेले २ तथा जेजे स्मिथ र बर्नार्ड शोल्ट्जले एक एक विकेट लिए ।

अन्तिम खेलमा दुवै टिमलाई जित निकाल्दै सुपर १२ मा प्रवेशको अवसर रहेको थियो । जसमा नामिबियाले बाजी मारेको छ ।

योसँगै सुपर १२ मा छिर्ने टिम पक्का भएका छन् । समूह एमा श्रीलंका र नामिबिया तथा समूह बी बाट स्कटल्याण्ड र बंगलादेश सुपर १२ मा प्रवेश गरेका छन् ।