अक्षर पटेलको स्थानमा सार्दुलले विश्वकप खेल्ने

काठमाडौं । भारतले युएई र ओमानमा संयुक्त रुपमा हुने आईसीसी टी-ट्वान्टी विश्वकप क्रिकेट खेल्ने टिममा एक खेलाडी परिवर्तन गरेको छ ।

भारतीय क्रिकेटको सर्वोच्च निकाय बीसीसीआईले बुधबार एक खेलाडी परिवर्तन गरिएको जनाएको छ ।

बीसीसीआईको छनोट समितिले अक्षर पटेललाई वैकल्पिक खेलाडीमा राख्दै सार्दुल ठाकुरले १५ सदस्सीय टिममा राखेको छ । यस अघि भारतले घोषणा गरेको टिममा पटेल टिममा रहेका थिए ।

भारतले विराट कोहलीको कप्तानीमा विश्वकप खेल्नेछ । भारतले घोषणा गरेको टिममा रोहित शर्मा उपकप्तान रहेका छन् ।

यस्तै केएल राहुल, सूर्यकुमार यादव, ऋषव पन्त, इशान किशन, हार्दिक पाण्डय, रविन्द्र जडेजा, राहुल चाहर, रविचन्द्र आश्विन, सार्दुल ठाकुर, भरुण चक्रवर्ती, जस्प्रित बुम्राह, भुवनेश्वर कुमार र मोहमद शामी टिममा रहेका छन् ।  

कोरोना महामारीको कारण भारतबाट सरेको विश्वकप अक्टोबर १७ बाट नोभेम्बर १४ सम्म हुनेछ ।

भारतले विश्वकपको पहिलो खेलमै पाकिस्तानसँग खेल्नेछ ।

सुपर १२ को समूह २ मा रहेको भारतले पाकिस्तानसँग अक्टोबर २४ मा प्रतिस्पर्धा गर्नेछ । 

भारत र पाकिस्तानबीचको खेल दुबईमा हुनेछ । 

अन्तिम पटक दुवै टिम सन् २०१९ को वान डे विश्वकपमा भिडेका थिए । जसमा भारत विजयी बनेको थियो ।

सुपर-१२ को समूह २ मा भारत र पाकिस्तानसँगै न्युजिल्याण्ड, अफगानिस्तान र पहिलो राउण्डको समूह 'बी' विजेता र समूह 'ए' को उपविजेता यस समूहमा रहने छन् ।