काठमाडौं । युरोपेली च्याम्पियन्स लिगमा भर्खरै रियल मड्रिडले इन्टर मिलानलाई हरायो र त्यसपछि एउटा यस्तो तथ्य बाहिर आएको छ, जसले भन्छ, रियललाई इटालीमा जहिल्यै सजिलो हुन्छ ।
खासमा तथ्यांकले यस्तै बोल्छ, भलै पछिल्लो समय इटालीका केही क्लबले युरोपेली फुटबलमा मज्जाले धाक जमाएको छ ।
जति जति बेला रियल इटालीमा च्याम्पियन्स लिगका खेल खेल्न जान्छ, विजयी भएर निस्कन्छन् ।
च्याम्पियन्स लिगका खेलका लागि रियल इटाली जाँदाका पछिल्ला १४ खेलमध्ये १३ मा रियल विजयी रहेको छ र यसकै एउटा क्रम हो, उसले इन्टरलाई भर्खरै हराएको ।
यी खेलमा भएका गोललाई आधार मान्ने हो भने अझ समीकरण एकपक्षीय देखिन्छ ।
रियलले यी खेलमा जहाँ १५ गोल गरेको छ, त्यहीं उसले तीन गोल मात्र खाएको छ । त्यसैले रियलका लागि इटालीको यात्रा अब कम चिन्ताको विषय हुन थालेको छ ।
पछिल्ला १५ खेलमध्ये रियलले १४ मा त एक गोल न एक गोल गरेको नै छ । रियलले समग्रमा इटालीमा २४ च्याम्पियन्स लिग गोल गरेको छ ।
जिनेदिन जिदान प्रशिक्षक भएको बेला भने सन् २०१८ को अप्रिलमा रियल एकपल्ट पराजित भएको थियो । त्यो सेमिफाइनलको दोस्रो लेग थियो र टुरिनमा भएको खेलमा युभेन्ट्स ३–० ले विजयी रहेको थियो ।
यो त्यही खेल हो, जसमा क्रिस्टियानो रोनाल्डोले प्रसिद्ध ओभरहेड किकबाट गोल गरेका थिए । अब त झन तिनै रोनाल्डोले पनि इटाली छाडिसकेका छन् ।
–मार्काको सहयोगमा ।
