काठमाडौं । फुटबल विवादको छानविनका लागि राष्ट्रिय खेलकुद परिषद् (राखेप)द्धारा गठित छानविन समितिले एन्फाभित्रको विवाद आफै समाधान गर्न निर्देशन दिन सुझाव दिएको छ ।
करिब दुई हप्ता लगाएर तयार पारिएको प्रतिवेदनको निष्कर्श अनुसार फुटबलको विकास र विस्तारका लागि सम्बन्धित सबै पक्षले विवाद एवं मनमुटावलाई आपसी समझदारी कायम गर्दै अघि बढ्नुपर्ने निष्कर्श निकालेकाे हो ।
राखेपको छानविन समितिले अब उप्रान्त एन्फामा कुनै समस्या वा विवाद सिर्जना भए आफै समाधान गर्न र नसकेमा राष्ट्रिय तथा अन्तराष्ट्रिय हस्तक्षेप नगराई अभिभावकिय संस्था, राखेपलाई अनुरोध गर्न समेत निर्देशन दिएको छ ।
नियमनकारी निकाय आफु रहेको अवस्थामा युवा तथा खेलकुद मन्त्रालयलाई विवाद छानविनका लागि आग्रह गर्ने एन्फाको निर्णयमा परिषद्ले असन्तुष्टि पोखेको हाे ।
'विवादको उजुरी, छानविन र अनुशासन कायम राख्न एन्फाका आफ्नै निकाय छन् । तर तीन अपूर्ण छन् ।' छानविन समितिका संंयोजक एवंम बोर्ड सदस्य पुरेन्द्रबिक्रम लाखेले भने, 'संस्थाका समितिलाई पूर्णता दिएर विवादको छानविन र समाधान गर्न नसक्नु एन्फाकै कमजोरी देखिन्छ ।'
छानविन समितिले एन्फाका सम्पूर्ण पदाधिकारी, अफिसियल, प्रशिक्षक लगायतले आफ्नो पदीय पर्यादालाई ध्यानमा राखी कार्य गर्नुपर्ने निष्कर्श निकालेको छ ।
समितिले मुख्य प्रशिक्षक अब्दुल्लाह अलुमताइरीले विवादास्पद राजीनामा सम्बन्धि पोस्टलाई आफ्नो फेसबुकबाट हटाउन राखेपलाई निर्देशन दिन सुझाव दिएको हो ।
वरिष्ठ उपाध्यक्षलाई कारण देखाउदै पदबाट राजीनामा दिने मुख्य प्रशिक्षक अलमुताइरीको घोषणा पछि एन्फा विवाद बाहिर आएको थियो ।
छानविनका क्रममा वरिष्ठ उपाध्यक्ष पंकज नेम्वाङ्गले आफु लक्षित पोस्ट मुख्य प्रशिक्षकले हटाएर सरी भनेको अवस्थामा विवाद समाधानका लागि आफु तयार रहेको बताएका थिए । तर मुख्य प्रशिक्षक अलमुताइरीले सो प्रस्ताव अस्विकार गरेका थिए ।
छानविन समितिले वरिष्ठ उपाध्यक्ष लक्षित पोस्ट हटाउन मुख्य प्रशिक्षकलाई निर्देशन दिन सुझाव दिएका छ ।
मुख्य प्रशिक्षकको सो पोस्टसंगै वरिष्ठ उपाध्यक्षले घटनाको छानविन गर्न एन्फामा निवेदन दिएका थिए । निवेदन दिनेमा मुख्य अलमुताइरी समेत थपिएका थिए ।
एन्फा कार्यसमितिले घटनाको उच्चस्तरीय छानविनका लागि युवा तथा खेलकुद मन्त्रालयलाई आग्रह गर्ने निर्णय गरेको थियो । मन्त्रालयको निर्देशन अनुसार राखेपले पुरेन्द्र बिक्रम लाखे नेतृत्वमा ७ सदस्यीय छानविन समिति गठन गरेको थियो । समितिले घटनामा संलग्न कागजात र पात्रसंग सोधपुछ र अनुसन्धान गरेर दुई हप्तापछि राखेपलाई प्रतिवेदन बुझाएको हो ।
मुख्य प्रशिक्षक र दुई पत्रकारबीचको घटनाको सन्दर्भमा छानविन समितिले सात दिनभित्र दुवै पक्षलाई विवाद समाधानका लागि एन्फा नेतृत्वले पहल लिएर समस्या समाधान गर्न निर्देशन दिने सुझाव दिएको छ ।
-1751767608.webp)
