काठमाडौं । करिम बेन्जेमाको उमेर पक्कै चढ्दै छ । तर उनी जति बुढो हुँदैछन्, त्यति उनको खेल पनि राम्रो हुँदैछ । स्पेनीस ला लिगामा आज रियल मड्रिड लेभान्टेविरुद्धको खेलमा उत्रदैछ र त्यसमा सबैको नजर यिनै बेन्जेमामा हुनेछ । एलाभेसविरुद्ध लिगको पहिलो खेलमा पनि उनले प्रभावशाली प्रदर्शन गरेका थिए, दुई गोलरसहित ।
रमाइलो के भने यस्तो दाबी हामी मुख र मनले मात्र गरिरहेका छैनौं, तथ्यांकले यस्तै भन्छ । अनि के पनि भनिन्छ भने तथ्यांकले झुट बोल्दैन् । खासमा उनी एक प्रकारले ‘अन सङ्ग हिरो’ हुन् । उनको अन्य ठूलो स्टारको जस्तो चर्चा हुन्न, बरू सके, विवाद नै बढी हुन्छ । तर उनले त्यस्तो समयमा पनि रियलको बोझ उठाए, जति बेला क्लबमा त्यस्ता ठूला स्टार थिएनन् ।
अहिलेका रियल प्रशिक्षक कार्लो एन्सेलोटी भन्छन्, ‘बेन्जेमालाई म फरवार्ड मात्र भन्न चाहन्न । खासमा उनी पूर्ण खेलाडी हुन् । अनि पाँच वर्षयता उनी अझ प्रभावशाली खेलाडी भएका छन् ।’ त्यसैले त, रियलले यी फ्रान्सेली खेलाडीसँग भर्खर नयाँ अनुबन्ध गरेको छ र त्यस अनुसार उनी सन् २०२३ सम्म रियलमै रहने छन् ।
एक वर्षपछि उनको अनुबन्ध सकिने स्थिति थियो, तर अब उनी कम्तीमा थप एक वर्ष रियलमै रहने छन् । सन् २००९ मा उनी लियोनबाट रियल आउँदा भर्खर २१ वर्षका थिए । अब कम्तीमा ३५ वर्ष हुँदासम्म उनी रियलमै रहेन छन् । यति लामो समय एउटै क्लबमा रहनुको अर्थ एक प्रकारले उनी राम्रो खेलाडी खेलाडी हो भन्ने अर्को प्रमाण पनि त हो ।
अझ के पनि भन्न सकिन्छ भने बेन्जेमा रियलका लेजेन्ड खेलाडी हुने क्रममा छन् र पछिल्ला १२ वर्षमा उनले २ सय ८१ गोल गरिसकेका छन् । त्यसको अर्थ उनी रियलका लागि सर्वाधिक गोल गर्ने सूचीको पाँचौं स्थानमा छन् । यसपल्ट उनी रियलका लागि १३ औं सिजन खेलिरहेका छन् र त्यस अगाडि उनले क्लबका लागि ५ सय ६० खेल खेलिसकेका छन् ।
–मार्काको सहयोगमा ।
