काठमाडौं । इटालीको सिरी ए भोलि शनिबारबाट सुरु हुँदैछ र यो अझै पनि युरोपका प्रमुख लिगमा पर्छ । इंग्लिस प्रिमियर लिग र स्पेनी ला लिगापछि नाम आउने भनेको यही लिगको त हो । त्यसमाथि भर्खरै इटालीले युरो २०२० जितेको स्थिति छ, त्यसले पनि प्रस्ट देखाउँछ, यो लिगमा के न केही पक्कै छ ।
अबको प्रश्न यसका इतिहासलाई लिएर हो, यसमा सबैभन्दा सफल क्लब कुन कुन हुन् त ? यसको सिधा सिधा उत्तर हो, युभेन्ट्स । उसले ३६ पल्ट लिग जितेको छ । त्यसैले अर्को प्रश्न पनि छ, के अब उसले फेरि लिग जित्ने छ त ? युभेन्ट्सले सन् २०१२ बाट लगातार लिग जितेको थियो, सन् २०२० सम्म ।
गत सिजन भने इन्टरले उसबाट उपाधि खोसेको थियो । संयोगले इन्टर नै सिरी ए को दोस्रो सफल क्लब हो, उसले १९ पल्ट लिग जितिसकेको छ । खासमा इटालीमा फुटबलको प्रतिस्पर्धा क्षेत्रको आधारमा हुन्छ । जस्तो, युभेन्ट्स टुरिनको भयो । उसलाई चुनौती दिने दुई प्रमुख क्लब मिलानमा हुन्, इन्टर र एसी मिलान ।
मिलानले १८ पल्ट लिग जितेको छ र सर्वाधिक सिरी ए जित्नेको तेस्रो स्थानमा छ । त्यसपछि रोममा दुई ठूला क्लब छन्, एएस रोमा र लाजियो । नयाँ सिजन इन्टरको पहिलो प्रतिद्वन्द्वी जेनोआ पनि कम्तीको छैन्, उसले नौ पल्ट लिग जितेको छ । यसपल्ट पनि लिग उपाधिका लागि दुई मिलान क्लब र युभेन्ट्सबीच नै हो, त्यसमा थपिने भनेको, एटलान्टा र नेपोली जस्ता टिम हुन् ।
–एएफपीको सहयोगमा ।
