विल्लकलाई जातीय दुर्व्यवहार
काठमाडौं । इंग्लिस क्लब न्युकासल युनाईटेडका मिडफिल्डर जोसेप विल्लकले आफु दैनिक जातीय दुर्व्यवहारको शिकार हुने गरेको बताएका छन् ।
बीबीसी रेडियोसँगको अन्तर्वार्तामा विल्लकले आफुलाई सामाजिक संजालको माध्यमबाट दैनिक अपमानजनक सन्देशहरु आउने गरेको बताएका छन् ।
विल्लकले दैनिक जातीय दुर्व्यवहारको शिकार हुने गरेको कारण आफु सामाजिक संजाल छाड्ने सोचमा पुगेको समेत बताए ।
'म हरेक दिन सन्देश पाउछु । मेरो रंग र फरक कुराहरुको बारेमा । जुन घृणित छन्,' उनले भनेका छन् ।
इंग्ल्यान्डका युवा मिडफिल्डर विल्लक हालै आर्सनलसँगको सम्झौता अन्त्य गर्दै न्युकासलमा अनुबन्धित भएका हुन् ।
२१ वर्षीय मिडफिल्डरले न्युकासलसँग ६ वर्षको सम्झौता गरेका छन् ।
विल्लकले जातीय दुर्व्यवहार रोक्न सामाजिक संजालहरुको सहयोग नगरेको बताए ।
'मलाई लाग्दैन की इन्स्टाग्राम, फेसबुक र ट्वीटले हाम्रो लागि पर्याप्त लडाई गरेको छ,' उनले थपे ।
