काठमाडौं । बायर्न म्युनिक अचेल विश्व क्लब फुटबलको सबैभन्दा लोकप्रिय र सफलमा पर्छ । जर्मन घरेलु लिगमा त उसको लगातार एक छत्र राज चलिरहेको छ ।
विश्वास नहुन सक्छ, उसले पछिल्ला नौ सिजन लिग उपाधि जितेको छ । युरोपमा पनि बायर्न एउटा महाशक्तिकै रूपमा रहेको छ । सन् २०१९–२० मा बायर्नले युरोपेली च्याम्पियन्स लिग जितेको थियो ।
आज भन्दा केही दशक अगाडि बायर्नको हैसियत यस्तो थिएन् । उसलाई यहाँसम्म पुर्याउन कसैको सबैभन्दा ठूलो हात छ भने त्यो गर्ड मुलरको छ । यिनै बायर्न लेजेन्डको आज आइतबार निधन भएको छ ।
पूर्व गोलरक्षक तथा अहिले बायर्नका सीईओ रहेका ओलिभर कानले ठीकै भनेका छन्, ‘बार्यनलाई विश्वकै लोकप्रिय र सफल क्लब बनाउनुमा मुलरको सबैभन्दा ठूलो हात छ ।’
सन् १९६४ मा उनी पहिलो पल्ट बायर्नसँग आवद्ध भएका थिए । त्यति बेला बायर्न दोस्रो डिभिजनमा थियो । त्यस पहिलो वर्ष नै उनले ३३ गोल गरे, नतिजा बायर्न बुन्डेलिगामा उक्लिन सफल रह्यो । अझ त्यसको पनि चार वर्षपछि त बायर्न जर्मन च्याम्पियन नै बन्यो । सायद त्यसपछि बायर्नले पछाडि फर्केर हेर्नु परेको छैन् ।
मुलरले १५ वर्ष बायर्नमा बिताए र एकपछि अर्को सफलता प्राप्त गरे । अनि एकपछि अर्को गोल पनि गरे । उनले फुटबल खेल्दा जर्मन अहिलेको जस्तो एक थिएन । उनले पश्चिम जर्मनीका लागि खेले र उत्तिकै प्रभावशाली प्रदर्शन गरे ।
सन् १९७० को विश्वकपमा उनले एक्लै १० गोल गरे । सन् १९७४ को विश्वकपमा जर्मनी च्याम्पियन नै बन्यो र त्यसका मुख्य खेलाडी पनि उनी नै थिए ।
–एएफपीको सहयोगमा ।
