काठमाडौं । गज्जब सुनिन्न र भने यो ? ‘मेस्सी मात्र मेस्सी होइनन, अरू पनि छन्, मेस्सी’।
बार्सिलोनाबाट पेरिस सेन्ट जर्मेन गएयता अर्जेन्टिनी फुटबल खेलाडी लियोनल मेस्सी लगातार चर्चामा छन् । यो चर्चा सेलाउने पनि छैन् । आखिरमा उनी विश्व फुटबलका सर्वकालीन महान खेलाडीमध्ये एक हुन् । त्यसैले त धेरै उनको नक्कल गर्न पनि खोज्छन् ।
अनि मिडियाले कोही अरू नै राम्रा खेलाडी निस्केको छ भने उनलाई तिनै मेस्सीसँग जोड्ने प्रयास पनि गर्छन् ।
यसै कारण जन्मिन्छन्, अरू ‘मेस्सी’ हरू पनि । अनि उनको पनि बेला बेलामा चर्चा हुने गर्छ । को को छन् त यस्ता मेस्सी ? फ्रान्सेली समाचार संस्था एएफपीको सहयोगमा तयार गरिएको यो आलेख ।
१. अरबी मेस्सी : ओमर अब्दुलरहमान
ओमर अब्दुलरहमान यूएईका खेलाडी हुन् र उनले पनि १० नम्बर जर्सि नै लगाउने गर्छन् । उनी एसियाली वर्ष खेलाडी पनि घोषित भइसकेका छन् । अहिले २९ वर्ष छोएका अब्दुलरहमानले आफ्नो पूरा खेल जीवन लगभग यूएईमै बिताएका छन् । एक पल्ट उनले म्यानचेस्टर सिटीका लागि दुई महिना ट्रायल पनि दिएका थिए । गल्फका मडिया उनलाई अरबी मेस्सी भन्छन् । अझ केहीले उनलाई एसियाली मेसी पनि भन्ने गरेका छन् ।
२. जापानी मेस्सी : ताकेफुसा कुबो
ताकेफुसा कुबोलाई जापानी मेस्सी भनेको चाहिं स्पेनी मिडियाले हो । उनको शरीर आफैमा सानो देखिन्छ, त्यसमाथि उनको ड्रिब्लिङ गज्जब छ, त्यसैले उनी भए, जापानी मेस्सी । एकपल्ट उनी बार्सिलोनाको एकेडेमीमा पनि थिए । अहिले उनी २० वर्षका मात्र भए र रियल मड्रिडमा आवद्ध छन् । रियलले ऋणमा उनलाई यताउता पठाउने गरेको छ । टोकियो ओलम्पिकमा पनि उनी सहभागी थिए र आफ्नो टिमलाई सेमिफाइनलसम्म पुग्न सहयोग गरे ।
३. आइरिस मेस्सी : जाक गिलसेनन
भर्खर नौ वर्षको हुँदा जाक गिलसेनन बार्सिलोनाको ला मेसिया एकेडेमीमा पुगेका थिए । पछि उनी लिभरपुल गए र अहिले ब्ल्याकबर्न रोबर्समा छन् । उनको खेल्ने शैलीका कारण उनलाई आइरिस मेस्सी भनिन्छ । उनी आफै भने यसलाई राम्रो मान्दैनन् । पर्थमा जन्मेका उनले अष्ट्रेलियाको प्रतिनिधित्व गरेर खेलिसकेका छन् । तर उनको परिवार भने आइरिस हो । रमाइलो त के छ भने यी गिलसेनन मेस्सीलाई भन्दा नेयमारलाई बढी मन पराउने गर्छन् ।
४. स्कटिस मेस्सी : रायन गउल्ड
क्यानाडाको भेन्कुभर ह्वाइटक्याप्सका लागि खेलिरहेका रायन गउल्डले डुन्डे युनाइटेडबाट खेल्न सुरु गरे । पछि उनले स्पोर्टिङ लिस्बनबाट पनि खेले । स्कटल्यान्डमा छँदा उनको खेल्ने शैली मेस्सीको जस्तो थियो, त्यसैले नाम पाइहाले, स्कटिस मेस्सी भनेर । गउल्ड पनि आफूलाई मेस्सीको नामसँग जोडिएका आपत्ति त गर्दैनन्, तर यसमा खुसी पनि छैनन् । उनी भन्छन्, कसैलाई कोहीसँग तुलना गर्नु ठीक छैन् । तर एकपल्ट उनलाई स्कटिस मेस्सी भन्न थालिएपछि त्यो रोकिएन् ।
५. इरानी मेस्सी : सरदार अजमन
इरानी फरवार्ड सरदार अजमनले १९ वर्षमै आफ्नो देशका लागि खेले, तर व्यवसायिक खेल जीवन भने अधिकांस समय रुसमै बिताएका छन् । अहिले उनी जेनिथ सेन्ट पिटर्सबर्गका लागि खेलिरहेका छन् । विश्वकप २०२२ मा इरानको छनोटका लागि उनले कडा मिहिनेत गरेर खेलिरहेका छन् । उनी राम्रा खेलाडी हुन्, त्यसैले उनको मेस्सीसँग तुलना गरिएको हो । तर उनी आफै के मान्छन् भने मेस्सी र उनको खेलमा धेरै फरक छ ।
