खेलाडी ‘रिकभरी’को समस्या

काठमाडौं । प्रभावशाली डिफेण्डर विकाश खवासलाई एनएसएलको अक्सनमा चार क्लबले बिट गरेका थिए । 'ए' श्रेणीका खवासको भाउ १ लाखबाट सुरु भएको थियो ।

अधिकतम २ लाखसम्म पुग्दा काठमाडौ, चितवन, ललितपुर र धनगढीले बोली लगाईरहे । उनी गोलाप्रथाबाट चितवनको टोलीमा परे । तर बहुप्रतिक्षित बनेको एनएसएलको पहिलो खेलमै चोट बोकेका १९ वर्षीय खवास दोस्रो खेलबाट भने मैदान उत्रन पाएनन् । चितवनले उनको स्थानमा 'ए' श्रेणीकै स्ट्राइकर जर्ज प्रिन्स कार्की ल्यायो ।

यता धनगढीले समेत एनएसएलकै लागि भनेर विदेशी खेलाडी एर्नेष्ट टम्पी झिकायो । उनीपनि पहिलो खेलमै चोट बोकेर मैदान बाहिरिए । अन्ततः उनले पनि एनएसएसका सम्पूर्ण खेल गुमाउने भए । उनको स्थानमा धनगढीले फ्रान्क्लिन कुउते झिकाएको छ । तेस्रो खेलमा उनी ‘नन प्लेईङ लिष्ट’ मा रहे ।

प्रतियोगिता अघिनै पोखराका सुजल श्रेष्ठ, काठमाडौंका त्रिदेभ गुरुङ, चितवनका विकास तामाङ लगायतका खेलाडी अक्सनमा रहेपनि चोटकै कारण प्रतियोगिता गुमाउन पुगे ।

प्रतियोगिताका खेल लगातार हुँदा खेलाडीले ‘रिकभरी’ हुने समय पाएका छैनन् । चोटबाट निको भएर फर्कने समय नपाउँदा खेलाडी र टिम समस्यामा देखिएका छन् । जसका कारण सहभागी टोलीले चोट बोकेका खेलाडीलाई ‘लिष्ट’ बाट बाहिर राख्दै रिक्त कोटा परिपूर्ती गरिरहेका छन् ।

आफ्नो दोस्रो खेलमा एफसी चितवनका विकास सहित ४ खेलाडीले चोट बोके । प्रशिक्षक मेघराज केसीले बुटबल लम्बिनीविरुद्ध मार्की खेलाडी भरत खवास, दुई इजिष्टका मिडफिल्डरद्धय अहमेद मोहमेद र एल्साएद शाबन गुमाउन पुगे ।

प्रशिक्षक केसीका अनुसार विकास ४ साता मैदान बाहिर रहनेछन् भने अन्य दुई खेलाडी अर्काे खेलका लागि तयारी हुने अपेक्षा गरिएको छ ।
यता, धनगढीले समेत चोटकै कारण खेल दौरान टेम्पी सहित दुई खेलाडी गुमाई सकेको छ । उसले दोस्रो खेलको १२ औं मिनेटमा स्ट्राइकर योगेश गुरुङ र मिडफिल्डर विवेक बस्नेतलाई गुमाएको थियो ।

अक्सनबाटनै सेट टिम तानेका प्रशिक्षक र ब्यवस्थापकलाई खेल दौरान खेलाडीले चोट बोक्दा समस्या देखिएको छ । टिमले सोचे अनुसार रणनीति बनाउन सकेका छैनन् । जसका कारण टोलीको प्रदर्शन एकै नाशको हुन सकेको छैन ।

धनगढी प्रशिक्षक युगल किशोर राई खेलाडी चोट बढ्दै जाने र रिकभरीको समय कम हुँदा टोलीलाई दबाब बढ्दै गएको बताउँछन् ।

‘खेलाडी रिकभरीको समयनै भएन । व्यस्त तालिका छ । एक दिनको ग्यापमै खेल्नुपर्छ । हामीले रातो कार्ड गरि ४ खेलाडी गुमाईसक्यौं । सबै खेलाडीको मसल्सको समस्या छ ।’ बिहीबार ललितपुर सिटी एफसीसँग १–१ को बराबरीमा रोकिएपछि राईले भने ।

तेस्रो चरणमा धनगढीका प्रशिक्षक राई व्यस्त तालिका र रिकभरी समयको अभाबबारे बोल्दा अन्य प्रशिक्षकले भने यस बिषयमा बोलेका छैनन् ।
प्रशिक्षक युगल रिकभरीका लागि केही टोलीलाई बढी र कोही टोलीलाई थोरै समय भएको बताउँदै व्यस्त तालिका परिवर्तन नभएसम्म यो समस्या गाह्रो हुने बताउँछन् ।

‘कुन टोलीमा चोट थोरै र कुनमा धेरै भन्ने मात्रै हो । मुख्य समस्या रिकभरी समय हो । त्यो नभएसम्म गाह्रो हुन्छ ।’ उनी भन्छन् ।

नेपालमा पहिलोपटक आयोजना भएको फ्रेन्चाईज नेपाल सुपर लिग बैशाख ११ गतेबाट सुरु भएको थियो । प्रतियोगिताको समापन जेठ १ गते हुनेछ । प्रतियोगिताको २१ दिनको अवधिमा २५ खेल हुनेछन् । लिग चरणमा २१ खेल हुनेछन् भने क्वालिफायर, इलिमेटर र फाइनल गरि अन्य ४ खेल हुनेछन् ।

प्रतियोगिताको विजेताले ३५ लाख प्राप्त गर्दा उपविजेता टोलीले १५ लाख प्राप्त गर्नेछ । यस्तै विधागत तर्फका विजेताले १–१ लाख पाउनेछन् । यता, खेलाडी समेत व्यस्त तालिका हुँदा रिकभरी समयको अभाव रहेका बताउँछन् ।

‘लगातार खेलले खेल्न गाह्रो भैरहेको छ । अलि व्यस्त तालिका नभएको भए राम्रो हुन्थ्यो । रिकभरी गरिहाल्ने अवस्था छैन ।’ राष्ट्रिय टिमका एक खेलाडी भन्छन् ।

हाल सहभागी टोलीले खेलाडीमा समस्या देखा पर्ने बित्तिकै उसलाई टोली बाहिर राखेर अर्काे खेलाडी राख्न थालेका छन् । आयोजकले समेत खेलाडी चोट बोके उसको स्थानमा अन्य खेलाडी झिकाउन पाउने प्रावधान राखेको छ ।

जसका कारण खेलाडी समेत दबाबमा छन् । उनीहरु खेल्नकै लागि भएपनि मैदान प्रवेश त गर्छन् । तर सोचेअनसार प्रदर्शन दिन सक्दैनन् । सोही कारण खेलाडी र टिमको प्रर्दशन तलमाथी भैरहेको छ ।

‘व्यस्त खेल तालिका भएपनि खेल्नै पर्याे । लगातार खेल्दा एकैनाशको प्रदर्शन रहँदैन । चोट भएपछि टोलीबाट निस्कनुपर्छ । यस्तो दबाब पनि छ । त्यसैले एकैनाशको प्रदर्शन भैरहेको छैन ।’ खेलाडी भन्छन् ।