काठमाडौं । सरकारले थ्री नेसन्स कप अन्तराष्ट्रिय फुटबलको उपाधि विजेता खेलाडीलाई जनही ४ लाख पुरस्कार दिने भएको छ ।
बुधबार सिंहदरबारमा मन्त्रिपरिषद्को निर्णय सार्वजनिक गर्दै सरकारका प्रवक्ता पार्वत गुरुङले खेलकुद मन्त्रालयको प्रस्तावमा थ्री नेसन्स विजेता टोलीलाई प्रतिव्यक्ति ४ लाख दिने निर्णय गरेको जानकारी दिए ।
त्यस्तै तीन जना प्रशिक्षकलाई जनही २ लाख दिने निर्णय भएको प्रवक्ता गुरुङले बताए ।
सरकारले यस अघि नै घोषणा गरेको पुरस्कारलाई मन्त्रिपरिषद्को बैठकले निर्णय गरेको हो ।
यस अघि अखिल नेपाल फुटबल संघ (एन्फा) ले विजेता खेलाडीलाई जनही १ लाख पुरस्कार दिने घोषणा गरेको थियो ।
दशरथ रंगशालामा फाइनलमा बंगलादेशलाई २-१ गोल अन्तरले पराजित गर्दै नेपालले उपाधि जितेको थियो ।
नेपाललाई उपाधि दिलाउन संजोक राई र विशाल राई 'बी' ले एक एक गोल गरेका थिए । बंगलादेशका महबुबुर रहमानले एक गोल फर्काएका थिए ।
थ्री नेसन्सको उपाधिसँगै नेपालले ३७ वर्षपछि घरेलु भूमिमा पहिलो उपाधि जितेको हो । यस अघि नेपालले सन् १९८४ को सागमा घरेलु मैदानमा उपाधि जितेको थियो ।
उपाधिसँगै नेपालले ५ हजार अमेरिकी डलर प्राप्त गरेको थियो । उपविजेता बनेको बंगलादेशले ३ हजार डलर प्राप्त गर्यो ।
- यस अघि प्रकाशित समाचारमा त्रिदेशीय फुटबल हुनु पर्नेमा अन्यथा भएकाले सच्चाईएको छ । - सम्पादक
-1753545694.jpg)
