काठमाडौं । सरकारले जारी गरेको निषेधाज्ञामा समेत नेपाल सुपर लिग नरोकिने भएको छ । फुटबलको पहिलो फ्रेन्चाईज प्रतियोगिता कोरोनाका कारण प्रभावित हुने ठानिएको थियो । तर सरकार एनएसएलप्रति नरम बन्दै पहिलो सिजन पुरा गर्न दिने भएको हो ।
सरकारले भोलि (बिहिबार)बाट दुई हप्ताका लागि काठमाडौं उपत्यकामा निषेधाज्ञा लगाउने निर्णय गरेको छ । तर निषेधाज्ञामा समेत एनएसएलका बाँकी खेल नरोकिने भएको हो ।
खेलकुद मन्त्री दामा तामाङले एनएसएलका बाँकी खेल पुरा गर्न दिने विषयमा सहमती जनाए । उनले समग्र देशको खेलकुदलाई हेरेर सरकारले निर्णय लिएको बताए ।
‘पछिल्लो तीन चार दिन अघि जुन परिवेशमा थियो । सुरुवात हुँदा यस्तो थिएन ।’ मन्त्री तामाङले खेलपाटीसंग भने, ‘परिस्थितीलाई गम्भिरता पुर्वक लिएर बिना दर्शक खेल गराउने निर्णय गरिएको हो ।’
‘विभागीय मन्त्रीले भन्दा पनि समग्र सरकारले निर्णय गरेको विषय हो । बाँकी कुरा परिस्तिथी हेरेर अघि बढ्ने हो ।’ मन्त्री लामाले थपे ।
एनएसएलको पहिलो सिजन बैशाख ११ गतेबाट सुरु भएको हो । प्रतियोगिता अन्तर्गत ५ खेल सम्पन्न भईसकेका छन् । सरकारले बैशाख १६ गतेबाट निषेधाज्ञा जारी गरेपछि एनएसएल समेत प्रभावित हुने बताईएको थियो । तर फ्रेन्चाईज फुटबलको पहिलो सिजन सक्न दिने बिषयमा सरकार सकारात्मक देखिएको हो ।
एनएसएलको घोषणा सन् २०१९ को पहिला दिन गरिएको थियो । तर दशरथ रंगशाला नबनेका कारण प्रतियोगिताले मुर्तरुप लिएन । दशरथ रंगशाला बनेपछि कोभिडका कारण प्रतियोगिता अघि बढेन । कोरोनाको प्रभाव कम हुँदै गएपछि प्रतियोगिताको पुन मिति घोषणा गरिएको थियो ।
एनएसएललाई लिएर सहभागी टिमले खेलाडी बन्दोवस्ती सहित विदेशबाट समेत खेलाडी झिकाएका छन् । सहभागी टिमले २२ दिनको प्रतियोगितामा खेलाडीलाई मोटो रकम तिरेका मात्र छैनन्, पाँच तारे होटलमा सुविधा सम्पन्न तरिकाले राखेका छन् ।
एक पटक घोषणा गरेर अबरुद्ध बनेको प्रतियोगिता दोस्रो पटक समेत बन्द हुँदा एनएसएल असफल हुने सम्भावना थियो । साथै प्रतियोगिता बिचैमा रोकिदा सहभागी टिमको करोडौं रुपैयाँ डुब्ने अवस्था थियो ।
सरकारले एन्फा र राखेपको आग्रहलाई स्विकार गर्दै निषेधाज्ञामा समेत एनएसएलको बाँकी खेल सम्पन्न गर्न दिने सहमती जनाएको छ । मंगलबारसम्म प्रतियोगिता अन्तर्गत ५ खेल सम्पन्न भईसकेका छन् ।
-1752288200.webp)
