निशानको गोलमा बाँसबारीको सहज जित

काठमाडौं । सहिद स्मारक 'बी' डिभिजन लिग फुटबलमा बाँसबारी युवा क्लबले सहज जित निकालेको छ ।

मंगलबार भएको खेलमा बाँसबारीले पुल्चोक स्पोर्ट्स क्लबलाई २-० गोल अन्तरले पराजित गरेको हो ।

एन्फा कम्प्लेक्स सातदोबाटोमा बाँसबारीलाई जित दिलाउन निशान सुनारले दुबै गोल गरे ।

पहिलो हाफ गोलरहित बराबरीमा सकिएको खेलको ४७ औं मिनेटमा निशानले गोल गर्दै बाँसबारीलाई अग्रता दिलाएका थिए ।

त्यसपछि खेलको ६९ औं मिनेटमा निशानले व्यक्तिगत दोस्रो गोल गर्दै बाँसबारीलाई २-० को जित दिलाए ।

जितसँगै बाँसबारी ८ खेलमा १८ अंक जोडेको छ ।

बाँसबारी लिगको तेस्रो स्थानमा रहेको छ ।

पुल्चोक २ अंक जोडेर पुछारमा रहेको छ ।

यस हारसँगै पुल्चोकको घटुवा हुने सम्भावना बढेको छ ।