काठमाडौं । साफ च्याम्पियनसिपको १२ औं संस्करण बंगलादेश जारी छ । ढाकास्थित बंगबन्धु रंगशालामा जारी च्याम्पियनसिपको सेमिफाइनल पुग्ने चार टोलीको समेत तय भईसकेको छ ।
साफको यस संस्करणमा नेपालसहित भारत, पाकिस्तान र माल्दिभ्सले सेमिफाइनलको यात्रा तय गरेका छन् । साफको उपाधि जीत्न नसकेको नेपालले चौथो पटक सेमिफाइनलमा स्थान बनाएको हो । अब नेपालले सेमिफाइनलमा माल्दिभ्ससंग बुधबार खेल्दैछ ।
साफको सेमिफाइनलमा स्थान बनाउन नेपालले समूह चरणमा निकै कठिन चुनौती पार गर्नुपरेको थियो । पहिलो खेलमा पराजित भएरपनि नेपालले लगातार दुई खेल्दै जित्दै अन्तिम चारको टिकट काट्न सफल भएको हो ।
यसै साफको विषयमा प्रशिक्षक तथा विश्लेषक मेघराज केसीसंग नेपालको प्रदर्शन र अबको यात्राबारे विश्लेषण गरेका छन् । खेलपाटी डटकमका रमेश सुवेदीसंगको कुराकानीले प्रशिक्षक केसीले प्रशिक्षकको रणनीति सफल भएको कारण सेमिफाइनल यात्रा तय भएको बताए । यस्तै उनले नेपाली खेलाडीले आफ्नो खुबीअनुसार प्रदर्शन गर्न सके उपाधि जितेर फर्कने बताए ।
प्रशिक्षक केसी के भन्छन् ? उनकै शब्दमा :
साफ च्याम्पियनसिपको पहिलो खेलमा नेपालले पाकिस्तानसंग खेल्यो । पहिलो खेलमा नेपालले जुन प्रकारको प्रदर्शन गर्नुपर्ने हो त्यो प्रदर्शन गर्न सकेन । पाकिस्तानले पनि त्यति राम्रो प्रदर्शन गर्न सकेको त हैन तर पाकिस्तान भाग्यमानी रह्यो, पाकिस्तानले जित्यो ।
नेपालको दोस्रो खेल भुटानसंग थियो । भुटानसंग नेपालको राम्रो प्रदर्शन थियो । अर्को नेपाललाई के सजिलो थियो भने, पाकिस्तानसंग भएको गल्ती सुधार्ने मौका पनि भयो । भुटानसंग मिश्रित खेल खेलेपनि नतिजा राम्रो आयो ।
तेस्रो खेलमा बंगलादेशसंग 'गर या मर' को स्थितिमा थियो नेपाल । बराबरी मात्रै भएपनि नेपालको सेमिफाइनल पुग्ने संभावना कम थियो । त्यसैले नेपाली खेलाडीहरु सबैले आफ्नो १०० प्रतिशत नै दिएर खेल्नुपर्ने थियो । नेपाली खेलाडीले त्यसअनुसार नै प्रदर्शन गरे ।
त्यसमा प्रशिक्षकको रणनिति पनि सफल भयो । प्रशिक्षकले सहि समयमा सहि निर्णयहरु गरे । खेलाडी परिवर्तन पनि ठिक समयमा गरे । बंगलादेशविरुद्ध उसैको घरेलु मैदानमा खेल्न खेलाडीलाई पनि कठिन थियो । तर, खेलाडीहरुले आफ्नो ब्यालेन्स टिम एकचोटि पनि बिगारेनन् । त्यसैले बंगलादेश एउटा पनि मुमेन्ट राम्रो बनाउन सकेन । नेपालविरुद्ध अट्याक गर्न पनि सकेन । नेपालले भने राम्रो खेलेर नतिजा राम्रो ल्यायो । र, नेपाल दोस्रो चरणमा पुग्न सफल भयो ।
साच्चीकै भत्रुपर्दा नेपालको फुटबलमा जुन खुबी छ, त्यो खुबी खेलाडीहरुले मैदानमा देखाए भने यसपटक साफ च्याम्पियसिप जित्न नेपाललाई गार्हो छैन । तर, आफुसंग भएको क्षमता १०० प्रतिशत खेलाडीले दिन सक्नुपर्यो ।
हाम्रो समूहमा जुन चार टिम छ । नेपालसहित पाकिस्तान, बंगलादेश र भुटानमध्ये सबैभन्दा तल्लो स्तरको टिम भुटान हो । भुटानले पहिलाको भन्दा केहि प्रगति गरेको छ । तर, साफ राष्ट्रमा उसको त्यो प्रदर्शनले अहिले भ्याउदैन । त्यसले अन्य तीन टिमले भुटानलाई हराउने त भैहाल्यो ।
पाकिस्तानसंगको पहिलो खेलमा नेपालको टिम सेटनै राम्रो हुन पाएन । र, नेपालले आफ्नो वास्तविक प्रदर्शन गर्न सकेन । त्यहिँ कारण नेपालले पाकिस्तानसंग हार बेहोरेको हो । किनकि पछिल्ला दुई खेलमा नेपालले जस्तो प्रदर्शन गर्यो पाकिस्तानसंग नेपालको त्यस्तो खेल थिएन ।
यति हो कि भुटान अन्य टिम भन्दा तल्लो स्तरको टोलि छ । अन्य तीन टोलीको खेल उस्तै छ । तर, पाकिस्तान र बंगलादेशभन्दा नेपालको स्तर राम्रो छ । अहिले भएका टिमका खेलाडीलाई राम्रो तरिकाले सेट गरेर खेलाउन सके टिम राम्रो बन्नेछ । पाकिस्तानसंगको खेलमा हाम्रो टिम सेट हुनै पाएन । भुटान र बंगलादेशसंग नेपालले पहिलो खेलको त्रुटीहरु सुधार्ने मौका पायो ।
नेपाल अहिले जारी साफको उपाधि जित्न सक्षम छ । तर, सक्षम छ भनेर मुखले मात्रै भनेर भएन । मैदानमा पनि त्यहिँ अनुसारको आफ्नो वास्तविक प्रदर्शन गर्न सक्नुपर्छ ।
नेपालको सुरुवाती प्लेइङ सेट पर्फेक्ट बनाउनु पर्छ । पाकिस्तानविरुद्ध नेपालको प्लेइङ सेट पर्फेक्ट थिएन । त्यहाँ गल्ती भएको छ । पाकिस्तानविरुद्ध खेलाडीको पोजिसन नै परिवर्तन गरेर खेलाईएको थियो । एकै चोटि त्यो लेभलको प्रतियोगितामा सेट पर्फेक्ट नराख्दा पोजिसनहरु परिवर्तन गर्दा खेल्न गार्हो हुन्छ ।
बंगलादेशसंगको खेलमा पर्फेक्ट सेट बनाईएको थियो । डिफेन्सलाई ब्यालेन्स डिफेन्समा राख्नुपर्छ । मिडफिल्डलाई मिडफिल्डमा र स्ट्राइकरलाई स्ट्राइकरमा मजबुत बनाएर राख्नुपर्छ । खेलमा जहिले आफुले एट्याक गर्दा स्ट्राइकरलाई मिडफिल्डरले सपोर्ट गर्नु पर्छ, मिडफिल्डरलाई डिफेन्सले सहयोग गर्नुपर्छ ।
त्यस्तै प्रतिद्वन्द्वीसंग बल रहदा, उनीहरुले अट्याक गर्दा डिफेन्स ब्यालेन्समा बस्नुपर्छ । डिफेन्सलाई मिडफिल्डरले तल झरेर सहयोग गर्नुपर्छ । मिडफिल्डर तल झरेपछि स्ट्राइकर तल झरेर मिडफिल्डरलाई सहयोग गर्नुपर्छ ।
सेमिफाइनलमा नेपालले माल्दिभ्ससंग खेल्नेछ । माल्दिभ्स र श्रीलंका जो आएपनि उनीहरु र हाम्रो स्तर बराबरी हो । यी टोलीविरुद्ध नेपालले सुखद नतिजा निकाल्न सक्छ ।
त्यस्तै भारतसंग नेपालले प्रतिस्पर्धा गर्नु परे पनि उसले आफ्नो सिनियर टिम पठाएको छैन । तर, भारत कमजोर टिम छैन । सिनियर टिम जतिको खेलाडी नभएता पनि उसको खेलाडीहरु राम्रा छन् । तर, नेपालले आफ्नो वास्तविक खेल खेल्यो भने सेमिफाइनलमा जित निकाल्न गार्हो छैन ।
-1751593454.webp)
