कर्णालीलाई हराउँदै प्रदेश २ को सुखद बिदाई

काठमाडौँ । प्रधानमन्त्री कप राष्ट्रिय महिला क्रिकेट प्रतियोगिताको आफ्नो अन्तिम खेलमा प्रदेश २ ले जित हात पारेको छ ।

कर्णाली प्रदेशलाई १ सय ४३ रनले पराजित गर्दै प्रदेश २ ले प्रतियोगिताबाट सुखद बिदाई लिएको हो ।

दुवै टिम एक खेल अगावै प्रतियोगिताबाट बाहिरिसकेका थिए ।

दाङको लमहीमा १ सय ६६ रनको लक्ष्य पछ्याएको कर्णालीले ९ विकेट गुमाएर मात्र २२ रन बनायो ।

कर्णालीका कुनै पनि खेलाडीले दोहोरो अंकको स्कोर छुन सकेनन् । ओपनर त्रिशाना विश्वकर्माले ७ रन बनाउँदा अन्य ६ खेलाडी डक आउट भए ।

प्रतियोगिताभर कर्णालीका कुनैपनि खेलाडीले दोहोरो अंकको स्कोर बनाउन सकेनन् ।

कर्णालीलाई सस्तैमा रोक्न कबिता गौतम र सरस्वती कुमारीले ३ विकेट लिइन् ।

यसअघि लमही मैदानमा टस जितेर पहिले ब्याटिङ गरेको प्रदेश २ ले निर्धारित ओभरमा ३ विकेट गुमाएर १ सय ६५ रन बनायो । उसकी अनुराधा चौधरीले सर्वाधिक ६९ रनको अर्धशतकीय इनिङ्स खेलिन् ।

यस्तै, शोभा आलेले २३ रन बनाउँदा बिमला मगर २१ रनको योगदान गरिन् । कर्णालीकी निशा पराजुलीले २ विकेट हात पारिन् ।

दुवै टोली यसघिनै प्रतियोगिताबाट बाहिरिएका छन् । समुह ’ए’ मा रहेका एपीएफ र लुम्बिनी प्रदेश सेमिफाइनल पुगिसकेका छन् ।

सोमबार दिउँसोको खेलमा एपीएफ र लुम्बिनी भिड्दै छन् । सेमिफाइनल पुगिसकेका दुवै टोली समुह विजेताको लागि प्रतिस्पर्धा गर्नेछन् ।