एजेन्सी । म्यान्चेष्टर सिटीका प्रशिक्षक पेप ग्वार्डीओलाले क्लबले फरवार्डमा लगानी गर्न आवश्यक नरहेको बताएका छन् ।
यस सिजन गोलका लागि संघर्षरत देखिएको सिटीका प्रशिक्षकले क्लबमा नयाँ फरवार्डको आवश्यकता नदेखेका हुन् ।
उनले क्लबका फरवार्ड ग्याब्रियल जिसस र सर्जियो अग्युरोलाई स्थानान्तरण गर्न आवश्यक नरहेको बताए ।
यस सिजन प्रिमियर लिगका १२ खेलमा सिटीले मात्र १८ गोल गरेको छ । पछिल्ला तीन सिजन भन्दा सिटीले निकै कम गोल गरेको हो ।
पछिल्लो वर्ष यस अवस्थासम्म सिटीले ३५ गोल गरेको थियो । दुई वर्षअघि ३६ र तीन वर्षअघि ३८ गोल गरेको थियो ।
नयाँ फरवार्डको आवश्यकताबारे ग्वार्डीओलाले भने, ‘अवश्यपनि चाहिएको छैन ।’
अग्युरोले १ सय ८ मिनेटमा कीर्तिमानी एक गोल गर्ने गरेका छन् । ग्याब्रियलले एक गोल गर्न १ सय ४० मिनेट लगाउने गरेका छन् ।
ग्याब्रियलबारे ग्वार्डीओलाले भने, ‘उनी एक व्यक्ति हुन् । जो गोल गर्छन् । तर यो सबै उनको काँधमा छैन । हामीले अन्तिम पटक वेस्ट ब्रोमसंग १–१ को बराबरी खेल्यौ । सेन्टर डिफेन्डरले नि गोल गर्न सक्छन् । सबैको जिम्मेवारी छ । खेल जित्न आवश्यक छ । जित्नका लागि सबै जिम्मेवार छन् ।’
‘उनीहरुले आत्मविश्वास गुमाएका छैनन । उनीहरुको अविश्वसनीय व्यक्तित्व छ । उनीहरु प्रतिभाशाली छन् । हामी सकारात्मक हुन आवश्यक छ । आक्रमक हुन आवश्यक छ । डर विहिन तरिकाले गोल गर्न आवश्यक छ । हामीले लगातार प्रयास जारी राख्नुपर्छ । अन्य कुनै विकल्प छैन । यदी २५ प्रहार पर्याप्त हुदैन भने हामीले अझ पनि अवसर सिर्जना गर्नुपर्छ ।’ ग्वार्डीओलाले थपे ।
वेस्ट ब्रोमविरुद्ध अग्युरोले अन्तिम १४ मिनेट खेलेका थिए । उनले शुक्रबारसम्म अभ्यास गरेका छैनन् । शनिबार साउथह्याम्पटनविरुद्ध उनी मैदान उत्रने सम्भावना कम छ ।
खेलपछि उनले अभ्यास गरेका छैनन् । ग्वार्डीओलाले भने, ‘हिजो अभ्यास गरेनन् । शुक्रबार उनले राम्रोसंग अभ्यास गरे । मलाई थाहा छैन, उनी कति मिनेट खेल्न सक्छन् ।’
