पारसलाई भोट गर्ने आज अन्तिम दिन

काठमाडौं । राष्ट्रिय क्रिकेट टिमका पूर्व कप्तान पारस खड्कालाई 'आईसीसी पुरुष एसोसियट प्लेयर अफ दि डिकेड' अवार्डका लागि भोट गर्ने आज (बुधबार) अन्तिम दिन ।

अन्तराष्ट्रिय क्रिकेट परिषद (आईसीसी) ले मङ्सिर ९ गते सार्वजनिक गरेको 'आईसीसी पुरुष एसोसियट प्लेयर अफ दि डिकेड' को मनोनयनमा राष्ट्रिय क्रिकेट टिमका पूर्व कप्तान खड्का समेत रहेका छन् ।

सन् २०१० बाट सन् २०२० सम्मको उत्कृष्ट प्रदर्शन गर्ने खेलाडीको सूचीको एसोसियटतर्फ पूर्व कप्तान पारस अटाउन सफल भएका हुन् ।

पारसको नेतृत्वमा नेपालले डिभिजन ५ देखि टी-ट्वान्टी विश्वकप हुँदै ऐतिहासिक एकदिवसीय अन्तराष्ट्रिय मान्यताको यात्रा तय गरेको छ । जसको कारण यो दशकलाई नेपालको गोल्डेन समयकाे रुपमा समेत हेर्ने गरिएकाे छ ।  

पछिल्लाे एक दशकमा पारसले एकदिवसीय तथा टी-ट्वान्टी दुवै अन्तराष्ट्रिय क्रिकेटमा शतक प्रहार गर्न सफल भए ।

पारससँगै दशककै उत्कृष्ट खेलाडी अवार्डका लागि एसोसियटतर्फ ६ खेलाडी मनोनयनमा परेका छन् । अन्य खेलाडीमा स्कटल्याण्डका केली कोट्जेर, कालुम म्याक्लिओड र रिची बेरीङटन रहेका छन् ।

यस्तै, पपुवा न्युगिनीका असाद भाला र नेदरल्यान्ड्सका पिटर बोरेन मनोनयनमा परेका छन् । समर्थकको भोटका आधारमा गरिने यो सम्मानका लागि नेपालका पारस प्रमुख दाबेदार हुन् ।

आईसीसीले भोटिङ सुरु गरे लगत्तै आईसीसीको सो सर्भर समेत केहि समय डाउन भएको थियो ।

भोट गर्न यस लिंकमा जानुहोस : लिंक