काठमाडौं । नेपाल क्रिकेट संघ (क्यान) ले गत सेप्टेम्बरमा राष्ट्रिय क्रिकेट टिमको मुख्य प्रशिक्षकका लागि दरखास्त आह्वान गरेको थियो ।
क्यानले २० दिनको म्याद राखेर आह्वान गरेको दरखास्तमा ७७ जना प्रशिक्षकले आवेदन दिएका थिए ।
क्यानले अन्तर्वार्ताका लागि छनोट हुने प्रशिक्षकको सूची समेत तयार गरिसकेको छ । क्यानले अन्तर्वार्तामा छनोट हुने प्रशिक्षकको सूची अन्तराष्ट्रिय क्रिकेट परिषद (आईसीसी) लाई समेत पठाईसकेको छ ।
यस्तै क्यानले मुख्य प्रशिक्षक छनोटका लागि ५ सदस्सीय छनोट समिति समेत गठन गरिसकेको छ । तर, आईसीसीले अन्तर्वार्ताको मिति तय नगर्दा मुख्य प्रशिक्षक छनोटमा ढिलाई भईरहेको छ ।
'अन्तर्वार्ताको लागि ५ जनाको प्यानल बनिसकेको छ । जसमा ३ जना क्यानबाट १ जना आईसीसी र १ जना स्वतन्त्र विज्ञ रहेका छन्,' क्यानका अध्यक्ष चतुर बहादुर चन्दले खेलपाटीसँग भने, 'अहिले हामी अन्तर्वार्ताको मिति कुर्दै बसेका छौं । प्रक्रिया तिहार अघि बाटै सुरु हुन्छ ।'
मुख्य प्रशिक्षकका लागि आवेदन धेरै परेको कारण अन्तर्वार्ता समय धेरै लाग्ने समेत चन्दले बताए ।
'छनोट प्रक्रिया तिहार अघिबाट सुरु भएपनि आवेदन धेरै परेको कारण लामो समय जान सक्छ । आईसीसीसँग निरन्तर छलफल हुँदै आएको छ । उसको प्रतिनिधिको समय मिलाएर प्रक्रिया छिटो सुरु हुन्छ,' चन्दले भने ।
आईसीसीबाट लामो समय निलम्बनमा परेको क्यान गत वर्ष सशर्त फुकुवा भएको थियो । जसको कारण क्यानले हरेक निर्णय आईसीसीको निगरानीमा गर्नु पर्ने हुन्छ ।
अन्तर्वार्ताकै क्रममा प्रशिक्षकसँग पारिश्रमिक बारे समेत छलफल हुनेछ । अन्तर्वार्तामा दुवै पक्षबीच सहमति मिले नेपालले छिटै मुख्य प्रशिक्षक पाउने छ । यस अघिका भारतीय प्रशिक्षक उमेश पटवालले मासिक ७ हजार अमेरिकी डलर पाउदै आएका थिए ।
गत फेब्रुअरीमा भएको विश्व क्रिकेट लिग अन्तर्गतको घरेलु सिरिजपछि नेपाली टिम मुख्य प्रशिक्षक विहीन रहेको छ । तत्कालिन प्रशिक्षक पटवालले राजीनामा दिएर स्वदेश फर्किएसँगै राष्ट्रिय टिम प्रशिक्षक विहीन भएको हो ।
क्यानले सुरुवातमा भारतीय मुलका प्रशिक्षक लालचन्द राजपुतलाई मुख्य प्रशिक्षक बनाउने तयारी गरेको थियो । तर, राजपुतसँग सम्झौता हुन नसकेपछि क्यानले दरखास्त आह्वान गरेको हो ।
यस अघि क्यानले नोभेम्बर भित्र मुख्य प्रशिक्षक छनोट भईसक्ने बताएको थियो । तर, क्यानको बोर्ड बैठक लगत्तै अध्यक्ष र सचिव अशोक नाथ प्याकुरेललाई कोरोना भाईरसको संक्रमण भएपछि छनोट प्रक्रिया थप लम्बिएको हो ।
नेपालको प्रशिक्षक बन्न चाहिने योग्यता :
- इंग्ल्यान्ड क्रिकेट बोर्ड वा क्रिकेट अष्ट्रेलियाबाट लेभल-३ कोर्ष पुरा गरेका प्रशिक्षक
- आईसीसी पूर्ण सदस्य वा फस्ट क्लास क्रिकेट टिम वा एसोसियट राष्ट्र वा अन्तराष्ट्रिय लिगमा तीन वर्ष प्रशिक्षकको भूमिका निभाएका
- क्रिकेटको जानकार तथा क्रिकेट कल्चर बुझेका
- ६० वर्ष ननाघेका पुरुष
-1747226778.jpeg)
