क्यानद्वारा गौतम बुद्ध रंगशालाको निरीक्षण

काठमाडौं । नेपाल क्रिकेट संघ (क्यान) का पदाधिकारीले चितवनमा निर्माणाधीन गौतम बुद्ध अन्तराष्ट्रिय क्रिकेट रंगशालाको निरीक्षण गरेको छ ।

क्यानका पदाधिकारीले मंगलबार बिहान धुर्मुस सुन्तली फाउण्डेशनले निर्माण गरिरहेको रंगशालाको अवलोकन गरेका हुन् ।

कृषि तथा वन विश्वविद्यालयले भोगचलन गरिरहेको मध्ये २० बिघा जग्गामा रंगशाला निर्माण भईरहेको छ ।

भरतपुर नगरपालिकाले उपलब्ध गराएको जग्गामा बन्ने रंगशाला नेपालको मौलिकता झल्कने गरि कमलको फुलको आकारमा निर्माण गरिनेछ । रंगशाला ३० हजार दर्शक क्षमताको हुनेछ ।

बोर्ड बैठकको लागि चितवन पुगेका पदाधिकारीले रंगशालाको अवलोकन गरेका हुन् ।

क्यानको बोर्ड बैठक चितवनमा बसिरहेको छ । क्यान निर्वाचनको झण्डै एक वर्ष पुग्न लागेको अवस्थामा बोर्ड बैठक बसेको हो ।

बैठकका लागि मुख्य ४ वटा एजेण्डा तय गरिएको छ ।

बैठकले संघको आगामी साधारण सभाबारे निर्णय गर्नेछ । कोरोना महामारीका कारण संघको साधारण सभा प्रभावित बन्दै आएको छ ।

यस्तै, संघको आर्थिक वर्ष २०७१÷७२ देखि २०७५÷७६ सम्मको आर्थिक लेखापरीक्षण प्रतिवेदनका सम्बन्धमा छलफल गर्ने एजेण्डा समेत तय गरिएको छ ।

बैठकमा अन्तराष्ट्रिय क्रिकेट परिषद् (आईसीसी) सँग भएका पछिल्ला काम कारबाहीबारे जानकारी गराउने र विविध गरि ५ वटा एजेण्डा तय गरिएको छ ।