प्रशिक्षण खुल्ला गर्न राखेपसंग एन्फाको माग

काठमाडौं । अखिल नेपाल फुटबल संघ (एन्फा)ले फुटबल प्रशिक्षण खुल्ला गर्न सरकारसंग माग गरेको छ ।

एन्फाका पदाधिकारीले बुधबार राष्ट्रिय खेलकुद परिषद् (राखेप)का सदस्य सचिव रमेश सिलवालसंग भेट गरि खेलाडीलाई प्रशिक्षणको वातावरण तयार गरिदिन अनुरोध गरेका हुन् ।

एन्फा अध्यक्ष कर्माछिरिङ शेर्पाले सरकारले खेलाडीलाई प्रशिक्षणका लागि तत्काल अनुमती प्रदान गर्नुपर्ने बताएका थिए ।

अन्य सबै क्षेत्र विस्तारै खुल्दै गएको उल्लेख गर्दै अध्यक्ष शेर्पाले खेलकुदलाई समेत खुल्ला गर्ने बिषयमा सरकारको ध्यानकर्षण गराएका हुन् ।

‘तत्काल प्रशिक्षण मात्र भएपनि खोलौं । अवस्था सामान्य भएपछि प्रतियोगिताको बिषयमा सोचौला तर खेलाडीलाई अभ्यासमा फर्काउन ढिला गर्न हुदैन । सरकारले यसमा बिशेष ध्यान दिन आवश्यक छ ।’ शेर्पाको भनाई उद्धित गर्दै छलफलमा सहभागी एन्फाका एक पदाधिकारीले भने ।

एन्फाले सरकारले अनुमती प्रदान गरेको अवस्थामा बिना दर्शक अन्तराष्ट्रिय मैत्रीपूर्ण फुटबल दशरथ रंगशालामा गर्न सकिने प्रस्ताव गरेको छ ।

एन्फाले मैत्रीपूर्ण फुटबल खेलका लागि धेरै देशबाट प्रस्ताव आएको उल्लेख गर्दै सरकारले तत्काल प्रशिक्षणको अनुमती दिनुपर्ने माग गरेको हो ।

एन्फासंगको छलफलमा सदस्य सचिव सिलवालले खेलाडीलाई प्रशिक्षणमा फर्काउन आफुले पहल गर्ने जानकारी गराएका थिए ।

एन्फाको मागप्रति आफु सकारात्मक रहेको बताउँदै उनले यस बिषयमा सरकारसंग संवाद गर्ने आश्वासन दिएका थिए ।

सरकारले यसअघि भदौ १ गतेबाट अन्तराष्ट्रिय खेलका लागि प्रशिक्षण खुल्ला गर्ने निर्णय गरेको थियो । तर कोरोना संक्रमण फैलिएको भन्दै सरकारले सम्पूर्ण खेल गतिविधि बन्द गरेको छ ।

सरकारले यस बिषयमा आवश्यक निर्णय नगर्दा खेलाडी सामान्य प्रशिक्षणमा फर्कन पाएका छैनन् भने सम्पूर्ण खेलकुद गतिविधि ठप्प अवस्थामा छ ।