काठमाडौं । लेग स्पिनर सन्दीप लामिछानेलाई नेपाली क्रिकेटको ग्लोबल आइकन बनाउने काम भारतको फ्रेन्चाइज क्रिकेट लिग इण्डियन प्रिमियर लिग (आईपीएल) ले गर्यो ।
सन् २०१८ को संस्करणमा दिल्ली क्यापिटल्स (डियरडेभिल्स) ले सन्दीपलाई अक्सनबाट न्युनतम मूल्यमा अनुबन्धित गरेको थियो ।
जतिबेला एसोसियट राष्ट्रबाट आईपीएलमा छनोट हुने सन्दीप तेस्रो खेलाडी थिए । त्यसअघि नेदरल्यान्ड्सका रायन टेन डोस्काटे र युएईका चिराग सुरीले मात्र आईपीएल टिममा अनुबन्धको मौका पाएका थिए ।
टेष्ट राष्ट्रका स्टार खेलाडीले भरिएको टिममा छनोट हुनु एसोसियट राष्ट्रका खेलाडीका लागि सामान्य थिएँन । तर, नेपालका सन्दीपले मौका पाए । अन्य कुनैपनि टी-ट्वान्टी प्रतियोगिता नखेलेका सन्दीप आईपीएलमा छनोट हुनु सामान्य थिएन ।
पहिलो सिजनमा नै डेब्युको मौका पाएका सन्दीपले ३ खेलमा नै आफ्नो क्षमता देखाए । विश्वको ध्यान आफुमा केन्द्रित गराउन सफल भए ।
डेब्यु सिजन ३ खेलमा ५ विकेट लिएर सन्दीपले आफ्नो परिचय विश्व क्रिकेटमा दिए ।
आईपीएल लगत्तै सन्दीपले वेष्ट इण्डिजविरुद्ध भएको च्यारिटी खेलका लागि विश्व-११ टिममा स्थान बनाए । सन्दीपले आफ्नो राष्ट्रबाट भन्दा पहिले विश्व-११ टिमबाट टी-ट्वान्टी अन्तराष्ट्रिय क्रिकेटमा डेब्यु गरे ।
त्यसयता सन्दीप वेष्ट इण्डिजको क्यारेबियन प्रिमियर लिग, अष्ट्रेलियाको बिग बास, पाकिस्तान सुपर लिग, अफगान प्रिमियर लिग, टी–१०, ग्लोबल टी–२० लिग र बंगलादेश प्रिमियर लिगमा सहभागिता जनाउदै आएका छन् ।
विश्व क्रिकेटमा पछिल्लो समय सन्दीप नेपालको प्रतिनिधि नै बनेका छन् । सायद अब सन्दीप बिना ति सबै फ्रेन्चाइज नेपालीको लागि अधुरो लाग्न सक्छ ।
सन्दीप यतिबेला आफ्नो अन्तराष्ट्रिय क्रिकेटको पहिलो स्टेसन आईपीएलकै लागि युएईमा रहेका छन् ।
सन्दीप लगातार तेस्रो वर्ष आईपीएल खेल्न युएई पुगेका हुन् । कोरोनाको महामारीको कारण भारतमा आयोजनाको सम्भावना नभएपछि १३ औं संस्करणको आईपीएल युएईमा हुन लागेको हो ।
यहिँ शनिबारबाट सुरु हुने प्रतियोगितामा सन्दीपको टिम दिल्लीको पहिलो खेल भने दोस्रो दिन हुनेछ ।
आगामी आइतबार दिल्लीले किङ्स इलाभेन पन्जाबविरुद्ध खेल्दै प्रतियोगिताको सुरुवात गर्नेछ ।
तर, सन्दीपले पहिलो खेल खेल्ने सम्भावना छैन । किनकि सीपीएल खेलेर युएई पुगेका सन्दीप क्वारेन्टिनमा रहेका छन् ।
यस्तै बाँकी खेलको लागि समेत सन्दीपले यस पटक कडा मेहनत गर्नु पर्ने देखिएको छ ।
दिल्लीको टिम अनुसार सन्दीपले यस सिजन धेरै खेलमा बेञ्चमा बस्नु पर्ने देखिन्छ । कारण, दिल्लीमा रहेका तीन भेट्रान स्पिनर ।
प्लेइङ सेटमा स्थान बनाउन सन्दीपले पहिलो सिजनबाटै स्पिनर अमित मिश्रासँग प्रतिस्पर्धा गर्नु परेको थियो । दोस्रो सिजन मिश्रासँगै अक्षर पटेल थपिए । अहिले सन्दीपले भेट्रान रविचन्द्र अश्विनसँग समेत प्रतिस्पर्धा गर्नु पर्नेछ ।
दिल्लीमा यस पटक स्पिनरको कुनै कमी छैन । त्यसमा समेत आश्विन र पटेलले आवश्यकता अनुसार ब्याटिङ गर्न सक्छन् ।
त्यसैले सन्दीपले विश्व क्रिकेटमा छाड्दै आएको छापको प्रभाव यस पटक नदेखिन सक्छ । यद्दपी सीपीएलमा लयात्मक बलिङ गरेका सन्दीपले टिमको आवश्यकता पुरा गर्नेमा विश्वास गरिएको छ ।
डेब्यु वर्ष सन्दीपले ३ खेल खेल्दा दोस्रो वर्ष दिल्लीबाट ६ खेल खेल्ने मौका पाएका थिए ।
आईपीएलले १३ औँ संस्करणसम्म आईपुग्दा दिल्ली उपाधि नजिक समेत पुग्न सकेको छैन । तर, यस पटक दिल्लीलाई उपाधिको दाबेदार मानिएको छ ।
क्रिकेट पण्डितहरु दिल्लीले उपाधि जिते आश्चर्य मान्नु नपर्ने बताउदै आएका छन् ।
क्रिकइन्फोले सार्वजनिक गरेको टिम प्रिभ्युमा भारतीय कमेन्टेटर आकाश चोपडाले दिल्लीले उपाधि जित्ने बताईसकेका छन् ।
पूर्व खेलाडी तथा दिल्लीका पूर्व कप्तान गौतम गम्भीर र डस्टिन सिल्गार्डोले समेत दिल्ली कम्तिमा प्लेअफ पुग्ने टिम रहेको बताएका छन् ।
यस्तै प्लेइङ सेटको चार विदेशी खेलाडीको रुपमा सन्दीपलाई समेट्ने क्रिकेट पण्डितहरु बताउछन् ।
क्रिकइन्फोले भने सन्दीपलाई प्लेइङ-११ बाहिर राखेका छन् ।
क्रिकइन्फो सम्भावित प्लेइङ-११ -
पृथ्वी श, शिखर धवन, मार्कस स्टोइनेस / एलेक्स केरी, श्रेयस आयर, ऋषब पन्त, सिम्रन हिट्मायर, अक्षर पटेल / अमित मिश्रा, किमो पाउल / ड्यानियल स्याम्स, रविचन्द्र आश्विन, इशान्त शर्मा / हर्षल पटेल
