काठमाडौं । नेपाल क्रिकेट संघ (क्यान) ले बिहीबार राष्ट्रिय टिमको मुख्य प्रशिक्षकसँगै अन्य विभिन्न पदका लागि दरखास्त आह्वान गर्यो ।
क्यानले एक विज्ञापन निकाल्दै मुख्य प्रशिक्षकसहित महाप्रबन्धक, वित्तीय प्रबन्धक, व्यवस्थापक तथा प्रदेश प्रशिक्षकका लागि दरखास्त आह्वान गरेको हो।
क्यानले पहिलो पटक मुख्य प्रशिक्षकको लागि खुल्ला रुपमा दरखास्त आह्वान गरेको हो । यस अघि क्यानले अन्तर्राष्ट्रिय क्रिकेट परिषद (आईसीसी) सँग समन्वय गर्दै प्रशिक्षक छनोट गर्ने गरेको थियो ।
क्यानले निकालेको विज्ञापनमा मुख्य प्रशिक्षक, महाप्रबन्धक, वित्तीय प्रबन्धक तथा व्यवस्थापकमा एक एक जना र प्रदेश प्रशिक्षकका लागि ७ जनाको माग गरिएको छ ।
क्यानले गत असार २६ गते नै एक हप्ता भित्र मुख्य प्रशिक्षक दरखास्त आह्वान गर्ने निर्णय गरेको थियो । तर, आईसीसीको प्रक्रियामा ढिलाई भएकाे कारण क्यानले झन्डै डेढ महिनापछि विज्ञापन खुलाएकाे हाे ।
क्यानले खुलाएको विज्ञापन अनुसार मुख्य प्रशिक्षकको लागि नेपाली तथा विदेशी प्रशिक्षकले आवेदन दिन सक्ने छन् । अन्य पदको लागि नेपाली नागरिक हुनु पर्नेछ ।
कसरी छनोट गरिन्छ मुख्य प्रशिक्षक ?
क्यानका सचिव अशोकनाथ प्याकुरेलका अनुसार मुख्य प्रशिक्षक छनोटका लागि आईसीसीसँगको सहकार्यमा संयन्त्र गठन गरिनेछ ।
'अपेक्षित आवेदन आएमा छनोटका लागि आईसीसीसँगको समन्वयमा एक संयन्त्र बन्ने छ । संयन्त्रले आवेदन आएका प्रशिक्षकको सर्टलिस्ट तयार पार्ने छ,' क्यानका सचिव प्याकुरेलले खेलपाटीसँग भने, 'तर, अहिलेसम्म कस्तो संयन्त्र बन्छ भनेर अहिले भन्न सकिने अवस्था छैन । किनकि २१ दिनको विज्ञापन भएकाले यो समयमा क्यान र आईसीसी मिलेर त्यसको प्रक्रिया सुरु गर्नेछ ।'
क्यानको योजना अनुसार संयन्त्र समितिले आवेदन दिने मध्येबाट अन्तर्वार्ताका लागि सम्भावित प्रशिक्षकको लिस्ट तयार गर्नेछ । संयन्त्रले छनोट गरेका प्रशिक्षकलाई अन्तर्वार्तामा बोलाईने छ ।
'क्यानको योजनामा एक प्यानल बनाएर प्रशिक्षक छनोट प्रक्रिया अघि बढाउने हो,' प्याकुरेलले भन्छन्, 'तर यहि हुन्छ भन्न अहिले क्यानले सक्दैन किनकि आईसीसीको समेत यसमा भूमिका हुनेछ । त्यसको लागि अझै एक हप्ता कुर्नु पर्छ सभवत यहि नै हुन्छ । जसरी हुन्छ खुला र पारदर्शी रुपमा हुन्छ ।'
आईसीसीसँगको कुराकानीमा प्रशिक्षक छनोटको लागि एक प्यानल बनाउने कुरा चलिरहेको उनले जानकारी गराए ।
प्यानलमा क्यानको प्रतिनिधि, आईसीसीको प्रतिनिधि र आवश्यकता अनुसार स्वतन्त्र प्रतिनिधि समेत हुने छन् । तर, त्यो प्यानलमा को र कस्ता व्यक्ति हुनेछन् भन्ने पछी निर्धारण हुने उनले बताए ।
यस्तै क्यानले नेपाली प्रशिक्षक भन्दा धेरै विदेशी प्रशिक्षकको आवेदन पर्ने अपेक्षा लिएको छ । अपेक्षित अनुसार आवेदन नपरे क्यानले विज्ञापनको समय लम्बाउने समेत सक्ने प्याकुरेलले जानकारी गराए ।
'क्यानको सोचाइमा नेपाली भन्दा विदेशी प्रशिक्षकले आवेदन दिने अपेक्षा लिएको छ । यस्तै २१ दिनको पहिलो चरणमा सोचे अनुरुप आवेदन नपरे क्यानले त्यस मितिलाई लम्ब्याउन समेत सक्ने छ,' उनले थपे ।
सहज तरिकाले काम बढे नेपालले अक्टोबरको मध्येसम्ममा मुख्य प्रशिक्षक पाउने समेत प्याकुरेलले बताए ।
क्यानले निकालेको विज्ञापन -
