मुख्य प्रशिक्षक फोर्लान बर्खास्त

एजेन्सी । उरुग्वेको क्लब एथ्लेटिको पेनारोलले मुख्य प्रशिक्षक डिएगो फोर्लानलाई बर्खास्त गरेको छ ।

क्लबले खराब प्रदर्शन गरेपछि पेनारोलले प्रशिक्षक फोर्लानलाई बर्खास्त गरेको हो ।

म्यानचेस्टर युनाइटेडका पूर्व फरवार्ड समेत रहेका फोर्लानलाई क्लबले ९ महिनामै बर्खास्त गरेको हो ।

४१ वर्षीय प्रशिक्षक फोर्लान गत डिसेम्बरमा मुख्य प्रशिक्षक नियुक्त भएका थिए । पेनारोल फोर्लानको खेल जीवनको पहिलो क्लब समेत हो ।

तर, उनको नेतृत्वमा क्लबले ११ खेलमा मात्र ४ जित निकाल्न सफल भएको थियो ।

बर्खास्तमा परेपछि सामाजिक संजालबाट फोर्लानले मौका दिएकोमा क्लबलाई धन्यवाद दिएका छन् ।

'मलाई यो अवसर दिएकोमा धन्यवाद,' ट्वीटरमा फोर्लानले लेखेका छन्,'धैर्यता,आदर र समर्पणको लागि खेलाडीलाई धेरै धेरै धन्यवाद ।'

उरुग्वेका पूर्व स्ट्राइकर समेत रहेका फोर्लानले २०१८ मा खेल जीवनबाट सन्यास लिएका थिए ।

युनाइटेडबाट प्रिमियर लिग र एफए कप विजेता फोर्लानले भारत, जापान र हङकङको क्लबबाट खेलेका थिए ।