काठमाडौं । पदमबहादुर भुजेल विदेश पलायन भएसँगै नेपालमा फिफा सहायक रेफ्रीको एक कोटा खाली भएको छ । गत माघमा शीर्ष डिभिजनको लिग जारी रहँदा सहायक रेफ्री पदम एन्फा रेफ्री संघ र रेफ्री कमिटीलाई थाहै नदिएर विदेश पलायन भएका थिए ।
पदम पलायन भएसंगै रेफ्री संघले पदमको ब्याज स्वतः खारेज गर्यो । त्यसयता एक कोटा खाली रहेको छ ।
यसै बर्षको अन्तिममा एन्फाले सो स्थान पूर्तिसँगै अन्य रेफ्री ब्याज नविकरणको लागि फुटबलको सर्बाेच्च संस्था (फिफा) र एसियाली खेलकुद महासंघ (एएफसी)मा नाम पठाउने तयारी गरेको छ ।
यसअघि रेफ्रीको फिटनेस टेष्ट एएफसीमा गएर दिनुपर्ने भएपनि हाल नेपालमै टेष्ट हुँदै आएको छ । टेष्टमा सफल हुनेको नाम रेफ्री कमिटीले एन्फा सचिवालयमा बुझाउने छ । एन्फाले नविकरणको लागि फिफा र एएफसीमा नाम पठाउने गरेको छ ।
हरेक बर्ष एन्फाले सेप्टेम्बरमा नाम पठाएका ब्यक्तीको फिफाबाट नाम स्विकृत हुँदै आएको छ ।
तर यसपटक फिफाबाट कुनै सुचना आएको छैन । कोरोना महामारीका बीच फिफाका कार्यक्रम अस्तव्यस्त भएका कारण नेपालमा समेत फिफाको नविकरण र कोटाको बिषयमा कुनै सुचना नआएको रेफ्री कमिटीले जनाएको छ ।
फिफाबाट कुनै सुचना प्राप्त नभएपनि एक कोटा पूर्तिका लागि दौडधुप सुरु भैसकेको छ । केहि सिनियर र सहायक रेफ्रीका लागि सक्षम देखिएका बीच दौडधुप देखिन थालेको हो ।
एन्फाको रेफ्री कमिटी र रेफ्री संघबीच आन्तरिक द्वन्द र एन्फा सचिवालयको हस्तक्षपका कारण यस पटकको कोटामा पनि रस्साकस्सी हुने पक्का देखिन्छ ।
उदाहरणका लागि गत बर्ष फर्कौ ।
गतबर्षको सहायक रेफ्रीको कोटामा पूर्णता पाउन भएको राजनीतिकरण र एन्फाको हस्तक्षपले धेरै बिषय बोल्छ ।
एन्फा रेफ्री संघकै कुरा मान्ने हो भने सुरुमा प्रतिस्पर्धामा आएका रेफ्रीबीच फिटनेश टेष्ट, उसको अनुशासनको रेखदेख र अघिको प्रदर्शन आधारमा फिफा ब्याज दिदै आएको छ । प्रतिस्पर्धी बीचमा केही भिन्नता नदेखिएको खण्डमा सिनियरको आधारमा ब्याज दिने प्रचलन छ । तर गतबर्ष भने यो नियमले प्राथमिकता पाएन ।
गतबर्ष एन्फा रेफ्री कमिटी र रेफ्री संघलाई थाहै नदिएर एन्फाले गरेको हस्तक्षपको तितो अनुभव रेफ्री संघसंग छ । एन्फा सचिवालयको ढाडो हस्तक्षपमा विभागीय टिम एपीएफका सहदेब श्रेष्ठले रेफ्री ब्याज प्राप्त गरेका थिए । यस पटक पनि सोही प्रलचन दोहरिने सम्भावना रहेको एक रेफ्रीले खेलपाटीलाई बताए ।
यस पटक रेफ्री ब्याजका लागि तीन जना सहायक रेफ्रीको दौडधुप सुरु भैसकेको छ । विभागीय आर्मीका विक्रम चौधरी, खुल्लातर्फ किशन यादव र चितवन जिल्ला फुटबल संघ नजिक रहेका प्रकाश भुजेल फिफा ब्याजका लागि प्रतिस्पर्धामा छन् ।
प्रकाश भुजेललाई छाडेर बिक्रम र किशन मुख्य प्रतिस्पर्धी रहेको पूर्व रेफ्रीहरु बताउँछन् । जसमा किशन यादवलाई प्रमुख दाबेदार मानिएको छ ।
रेफ्री कमिटीका सदस्य तथा पूर्व रेफ्री सुरेन्द्र सिख्राकार रेफ्रीबीच प्रतिस्पर्धा गराएरै फिफा ब्याज दिने बताउँछन् ।
‘प्रतिस्पर्धाका लागि सिनियर देखिएका र सक्षम देखिएका बीच प्रतिस्पर्धा गराउँछौ । त्यसमा जो अब्बल देखिन्छ सचिवालयनमा नाम पठाउँछौ ।’ उनले भने ।
‘प्रतिस्पर्धामा दुबै बराबर देखिए सिनियरको आधारमा ब्याज पाउनेछन् ।’ पूर्व रेफ्री समेत रहेको सिख्राकार बताउँछन् ।
सिख्राकारले समेत बिक्रम र किशननै मुख्य प्रतिस्पर्धी रहेको र दुबैको बराबर मौका रहेको बताउँछन् ।
रेफ्री संघका अध्यक्ष बुद्धि गुरुङले फिफाबाट कुनै सूचना नआएकाले अहिलेनै मुख्य प्रतिस्पर्धी छुट्याउन नसकिने बताउँछन् ।
‘अहिले फिफाबाट कुनै सूचना आएको छैन । केहि गराउन सकिने अवस्थापनि छैन । ए श्रेणीका सबै रेफ्रीहरु सक्षम छन् । उनीहरुनै प्रतिस्पर्धी हुन् । अहिलेनै भन्न सक्ने अवस्था छैन ।’ गुरुङ भन्छन् ।
नेपालमा फिफा रेफ्रीमा महिला र पुरुष गरि १२ वटा कोटा रहेको छ । जसमा पुरुषतर्फ ४ र महिलातर्फ १ रेफ्री रहेका छन् । यस्तै सहायकतर्फ पुरुष ६ र महिलातर्फ १ रेफ्री रहेकी छिन् ।
फिफा रेफ्री :
सुदिस कुमार पाण्डे, नविन्द्र महर्जन, श्रवण कुमार तामाङ, कविन ब्यन्जनकार र अस्मिता मानन्धर
फिफा सहायक रेफ्री :
रोजेन श्रेष्ठ, नानी राम थापा, माधब खत्री, युनाल मल्ल, शहदेव श्रेष्ठ र बिना श्रेष्ठ
