सहायक प्रशिक्षक फ्रेडीले छाडे आर्सनल

एजेन्सी । इंग्लिस क्लब आर्सनलका सहायक प्रशिक्षक फ्रेडी एलजङवर्गले क्लब छाडेका छन् ।

आर्सनलका पूर्व खेलाडी समेत रहेका फ्रेडीले आइतबार एक विज्ञप्ति निकाल्दै क्लब छाड्ने निर्णय गरेको बताएका छन् ।

४३ वर्षीय फ्रेडीले आफ्नो प्रशिक्षक अनुभवलाई थप विकास गर्न क्लब छाडेको बताएका छन् ।

'खेलाडी र प्रशिक्षकको रुपमा म सन् १९९८ बाट यस क्लबमा सक्रिय छु । यस अवसर दिएको क्लबसँग कृतज्ञ छु,' उनले विज्ञप्तिमा भनेका छन् ।

आर्सनलले गत वर्ष मुख्य प्रशिक्षक युनाई इम्री बर्खास्त गरेपछि उनी अन्तरीम प्रशिक्षक नियुक्त भएका थिए ।

नयाँ मुख्य प्रशिक्षक मिकेल अर्टेटा आएपनि उनी क्लबमै रहेका थिए ।

उनले आर्सनलको यू-१५ र यू-२३ टोलि समेत हेरेका थिए ।

स्विडेनका पूर्व विंगर समेत रहेका फ्रेडीले आर्सनलका लागि ३ सय २६ खेल खेलेका थिए ।

उनले आर्सनलबाट दुई पटक प्रिमियर लिग जितेका थिए । यस्तै एफए कप ३ पटक जितेका थिए ।