सन्दीपको टिम जमैकालाई १ सय ५९ रनको लक्ष्य

काठमाडौं । क्यारेबियन प्रिमियर लिग (सीपीएल) टी-ट्वान्टी क्रिकेटमा सन्दीप लामिछाने रहेको जमैका तलावाजलाई सेन्ट लुसिया जोउक्सले जितका लागि १ सय ५९ रनको लक्ष्य दिएको छ ।

ब्रायन लारा क्रिकेट स्टेडियममा टस हारेर पहिले ब्याटिङ गरेको सेन्ट लुसियाले २० ओभरमा ७ विकेट गुमाएर १ सय ५८ रन बनायो ।

सेन्ट लुसियाका लागि रोस्टन चेसले ५२ रनको अर्धशतकीय इनिङ्स खेले । यस्तै नाजिबउल्लाह जाड्रनले २५ रन जोड्दा आन्द्रे फ्लेटचरले २२ रन बनाए ।

मार्क डियलले १७ तथा मोहमद नाबीले १३ रन जोडे ।

जमैकाका मुजिब उर रहमान र भिरासामी परमाउलले २/२ विकेट लिए ।

सन्दीपले ४ ओभर बलिङ गर्दै २३ रन खर्चिएर १ विकेट लिए । आन्द्रे रसेलले पनि एक विकेट लिए ।

सन्दीपले जमैकाबाट पहिलो पटक खेलेका हुन् । जमैकाले सन्दीपलाई यस पटक ९० हजार अमेरिकी डलर (१ करोड ८ लाख नेपाली रुपैयाँ) मा अनुबन्ध गरेको थियो ।