काठमाडौं । घरेलु फुटबल फेरी अनिश्चित बनेको छ ।
कोरोना कहरका बीच सुरु हुन लागेको राष्ट्रिय टिमको प्रशिक्षण स्थगित भएसंगै घरेलु फुटबल पुन अनिश्चित बनेको हो ।
एसियाली फुटबल महासंघ (एएफसी)ले विश्वकप छनोटको दोस्रो चरणको खेल अर्को सुचना जारी नभएसम्मका लागि स्थगित गरेसंगै एन्फाले समेत फुटबल प्रशिक्षक तत्काल सुरु नगर्ने निर्णय गर्यो ।
छनोट प्रतियोगितानै अनिश्चित बनेपनि फुटबल खेलाडी पुन मैदान फर्कन समय लाग्ने देखिएको हो । एन्फाले अर्को सुचना जारी नभएसम्मका लागि राष्ट्रिय टिमको प्रशिक्षण स्थगित गरेको छ । प्रशिक्षण सुरु हुन नपाउँदै स्थगित भएपछि होटलको क्वारेन्टिनमा रहेका खेलाडीहरु घर फर्किएका छन् ।
एन्फा वरिष्ठ उपाध्यक्ष पंकज बिक्रम नेम्बाङ्गले विश्वनै महामारीसंग जुधिरहेको समय फुटबल गतिविधि अघि बढाउन समस्या भएको बताउँछन् ।
‘विश्वनै महामारीबाट प्रभावित भएको अवस्थामा फुटबल गतिविधि अश्चित बनेको हो । संक्रमणको अवस्था बढेसंगै तत्काल यसलाई रोकिएको हो ।’ नेम्बाङ्गले खेलपाटीसंग भने ।
सरकारले भदौ १ गतेबाट अन्तराष्ट्रिय प्रतियोगिताका लागि प्रशिक्षण सुरु गर्न अनुमती दिएको थियो । सोही अनुसार एन्फाले खेलाडीको कोरोना परिक्षणको ब्यवस्था मिलाएर प्रशिक्षण सुरु गर्ने तयारी गरेको थियो । तर अन्तिम समयमा एएफसीले खेल तालिका स्थगित गरेसंगै एन्फाले समेत सबै तयारी पुरा गरेर पनि प्रशिक्षणलाई अघि बढाएन ।
वरिष्ठ उपाध्यक्ष नेम्बाङ्ग फुटबल फर्कने बिषय अनिश्चित भएपनि यसैमा फुटबलको भविष्य खोज्नपर्ने बताउँछन् ।
‘कोरोना कहिलेसम्म रहन्छ थाहा भएन । तर चुनौतीको बीचनै खेलाडी, रेफ्री र प्रशिक्षका बिषयमा सोच्नुपर्छ । फुटबल टिमलाई कसरी लैजाने योजना बनाउन आवश्यक छ ।’ नेम्बाङ्ग भन्छन् ।
राष्ट्रिय टिमको प्रशिक्षण सुरु भएसंगै एन्फाले घरेलु फुटबलका गतिविधि अघि बढाउने तयारी गरेको थियो । राष्ट्रिय टिमलाई प्रशिक्षणमा फर्काउनेदेखि स्थगित अवस्थामा रहेका बी र सी डिभिजनका लिग सक्ने बिषयमा एन्फाले सरोकारवालासंग छलफल समेत गरेको थियो ।
तर उपत्यकामा कोरोनाको जोखिम बढेसंगै एन्फाले तत्काललाई घरेलु फुटबल गतिविधि अघि नबढाउने संकेत गरेको छ । कोरोनाको संक्रमण सामुदायको स्तरमा बढेसंगै एन्फाले बुधबारदेखि एक सातासम्मका लागि केन्द्रिय हेडक्वाटर बन्द गर्ने निर्णय गरेको छ ।
बरिष्ठ उपाध्यक्ष नेम्बाङ्गले रोकिएको घरेलु फुटबललाई सुरु गर्न योजनाबद्ध तरिकाले अघि बढ्न आवश्यक रहेको बताउँछन् ।
‘दोस्रो र तेस्रो डिभिजनका फुटबल रोकिएको छ । महामारी फैलिएको ठाँउमा परिक्षण गरेरपनि बिना दर्शक लिग सक्दै गईरहेका छन् । सरकारसंग अनुमती लिएर हामीले पनि रोकिएको लिगलाई सक्नुपर्छ ।’ उनले भने ।
-1753270648.jpeg)
