राखेप उपाध्यक्ष र सदस्य सचिवलाई एन्फाको बधाई

काठमाडौं । अखिल नेपाल फुटबल संघ (एन्फा) ले राष्ट्रिय खेलकुद परिषद (राखेप) का नवनियुक्त उपाध्यक्ष शिव काेइराला र सदस्य सचिव रमेश कुमार सिलवाललाई बधाई तथा शुभकामना दिएको छ ।

एन्फाले सोमबार सातदोबाटोस्थित एन्फा कम्प्लेक्समा एक कार्यक्रमको आयोजना गर्दै नवनियुक्त उपाध्यक्ष र सदस्य सचिवलाई बधाई तथा शुभकामना दिएको हो ।

एन्फाले राखेपका बोर्ड सदस्यमा नियुक्त भएका रिम रानाभाट, इन्दिरा निरौला, गोविन्द प्रसाद भट्टराई, अर्जुन बहादुर केसी, सम्पन्न श्रेष्ठ र सुवास श्रेष्ठलाई समेत बधाई तथा शुभकामना दिएको थियो ।

एन्फाका अध्यक्ष कर्मा छिरिङ शेर्पा तथा पदाधिकारीले उनीहरुलाई खादा लगाएर स्वागत गर्दै बधाई दिएका थिए ।

सरकारले गत साता राखेप उपाध्यक्षमा काेइराला र सिलवाललाई दोस्रो पटक सदस्य सचिवमा नियुक्त गरेको थियो ।

मन्त्रालयले गठन गरेको सिफारिस समितिले सिलवाल सहित तीन जनाको नाम सदस्य सचिवमा सिफारिस गरेको थियो ।

युवा तथा खेलकुद मन्त्री विश्वकर्माले प्रस्ताव गरेको नाममा मन्त्रीपरिषद्ले सिलवाललाई सदस्य सचिवमा नियुक्त गर्ने निर्णय गरेको हो ।

समितिले सदस्य सचिवका लागि सिलवाल सहित अन्जु श्रेष्ठ र लिलबहादुर थापा मगरलाई सिफारिस गरेको थियो ।

सरकारले झण्डै एक वर्ष अघि सिलवाललाई राखेपको सदस्य सचिवमा नियुक्त गरेको थियो । तर, नयाँ राष्ट्रिय खेलकुद विकास ऐन कार्यान्वयनमा आएसंगै सदस्य सचिव पदको पद खारेज भएको थियो ।