एजेन्सी । इंग्ल्यान्डको च्याम्पियनसिप क्लब बर्मीङघम सिटीले क्लबका पूर्व मिडफिल्डर जुड बेलिन्घमले प्रयोग गरेको २२ नम्बरको जर्सी प्रयोग नगर्ने भएको छ ।
इंग्ल्यान्डका युवा मिडफिल्डर जर्मन क्लब बोरुसिया डर्टमण्ड गएपछि बर्मीङघमले उनले प्रयोग गरेको जर्सी रिटायर्ड गर्ने निर्णय गरेको हो ।
बर्मीङघमले बिहीबार एक विज्ञप्ति निकाल्दै बेलिन्घमले प्रयोग गरेको जर्सी रिटायर्ड गर्ने निर्णय गरिएको जनाएको छ ।
अन्य खेलाडीलाई प्रेरणा दिन र बेलिन्घमको सम्झनाका लागि जर्सी रिटायर्ड गरिएको बर्मीङघमले जनाएको छ ।
यस्तै बर्मीङघमले क्लबका लागि बेलिन्घम रोल मोडल बनेको समेत उल्लेख गरेको छ ।
१७ वर्षीय मिडफिल्डरलाई यसै साता क्लबको कीर्तिमानी मूल्यमा बर्मीङघमले डर्टमण्डलाई बेचेको थियो । डर्टमण्डले उनलाई २६ मिलियन पाउण्डमा अनुबन्ध गरेको थियो ।
बेलिन्घम यो पहिलो व्यवसायिक सम्झौता समेत हो । डर्टमण्डसँग बेलिन्घमले पाँच वर्षको सम्झौता गरेका थिए ।
उनले क्लबका लागि अन्तिम खेल मंगलबार राति डर्बी काउन्टीविरुद्ध खेलेका थिए ।
बेलिन्घमले बर्मीङघमका लागि ४४ खेलमा ४ गोल गरेका थिए ।
