काठमाडौं । इन्डोनेसियामा जारी १८ औं संस्करणको एसियन गेम्स अन्तर्गत दशौं दिन सोमबार पनि नेपालको लागि निराश दिन रह्यो ।
नेपालले सोमबार आधा दर्जन खेलमा प्रतिस्पर्धा गरेको थियो । तर, अघिल्ला ९ दिन झैँ नेपालले आफ्नो सुन्य पदकको यात्रा कायम राख्यो ।
मुख्यत सोमबार नेपालले पदक जित्ने खेलमा रहेको दुई खेलको चुनौती नै सकियो । कराते र बक्सिङमा नेपालले पदक जित्ने आश गरेको थियो । तर, दुवै खेलका खेलाडीले देशको लागि पदक जित्न सकेनन् । करातेको महिला स्पर्धामा नेपालकी अनु अधिकारी कांस्य पदकका लागि भिडे पनि चुकिन् ।
एसियन गेम्समा नेपाललाई सर्वाधिक पदक दिलाउने खेलमा कराते र बक्सिङ समेत पर्छ । तर, एसियन गेम्समा सर्वाधिक पदक दिलाउने तेक्वान्दोपछि कराते र बक्सिङमा पनि नेपाल सुन्य हात घर फर्किएको छ । एसियन गेम्सको अघिल्ला संस्करणमा नेपालले तेक्वान्दोबाट १ रजत र १३ कांस्य, बक्सिङबाट ६ कांस्य र करातेबाट ३ कांस्य जितेको छ ।
एसियन गेम्सको दशौं दिन नेपालको ठुलो सफलता एक राष्ट्रिय कीर्तिमान तय हुनु रह्यो । नेपालका सोमबहादुर कुमालले ८ सय मिटर दौडमा राष्ट्रिय कीर्तिमान बनाएका थिए । अन्य खेलमा नेपालको प्रदर्शन हार बढी रह्यो ।
एसियन गेम्समा नेपाल पदकको प्रतिक्षामा रहदा चीनले आफ्नो शीर्ष स्थान यथावत राखेको छ । चीनले ८६ स्वर्णसहित कुल १९१ पदक जितेको छ । दोस्रो स्थान रहेको जापान ४३ स्वर्णसहित कुल १३६ पदक जितेको छ । २८ स्वर्णसहित कुल १०६ पदक जितेको दक्षिण कोरिया तेस्रो स्थानमा रहेको छ ।
भारतले ८ स्वर्णसहित ४१ पदक जितेको छ । दक्षिण एसियाली राष्ट्रमा भारतपछि पाकिस्तानले ३ कास्य र अफगानिस्तानले एक कास्य जितेको छ ।
नेपालको दशौं दिन कस्तो रह्यो ?
एथलेटिक्स :
एथ्लेटिक्समा नेपालमा सोमबहादुर कुमालले नयाँ राष्ट्रिय कीर्तिमान कायम गरेका छन् । कुमालले ८ सय मिटर स्पर्धामा कीर्तिमान कायम गरेका हुन् । उनले निर्धारित दुरी १ मिनेट ५० दशमलव २५ सकेन्डमा पुरा गरे ।
कुमालले सन् १९९५ को साग गेम्समा धनीराम चौधरीले बनाएको कीर्तिमान भङ्ग गरेका हुन् । धनीरामले १ मिनेट ५० दशमलव ६० सेकेन्डको राष्ट्रिय कीर्तिमान बनाएका थिए ।
यस्तै सरस्वती भट्टराईले महिला ८ सय मिटर दौडमा आफ्नो व्यक्तिगत समयमा सुधार गरेकी छिन् । जकार्ताको गेलारो बुङ कार्नो रंगशालामा सरस्वतीले निर्धारित दूरी २ मिनेट १२.८५ सेकेन्डमा पूरा गर्दै आफ्नो व्यक्तिगत समयमा सुधार गरेकी हुन् । सरस्वतीको उत्कृष्ट व्यक्तिगत समय २ मिनेट १३.९९ सेकेन्ड थियो ।
कराते :
एसियन गेम्समा पदक जित्ने खेल करातेमा नेपालको चुनौती सकिएको छ । ८ खेलाडी सहभागी करातेमा नेपालका कुनैपनि खेलाडीले पदक जित्न सकेनन् ।
सोमबार करातेमा दुई नेपाली खेलाडीले प्रतिस्पर्धा गरेका थिए । पुरुष ८४ केजीमुनि नेपालका दिवस श्रेष्ठ पहिलो चरणमा इरानका पोर्सब जाभिओलाहसंग ८–० ले पराजित भए ।
महिलाको ५० केजीमुनि नेपालकी अनु अधिकारी कांस्य पदकका लागि भिडे पनि चुकिन् । सागकी रजतधारी अनु कांस्य पदकका लागि भएको भिडन्तमा जापानकी मिहो मियातेरासंग ९–० ले पछि परिन् । पहिलो रिपाचेमा अनुले लाओसकी सिरिभिमाने सिरिमोङ खौनलाई ३–१ ले हराउदै कांस्य भिडन्त पक्का गरेकी थिइन् ।
पहिलो चरणमा भने अनुले मकाउकी चिङ छियुङलाई ५–१ ले पाखा लगाउदै क्वाटरफाइनलमा प्रवेश गरेकी थिइन् । क्वाटरफाइनलमा अनु ताइपेईंकी सियाउसुङ गुसंग ५–१ ले निराश हुनु पर्यो । सियाउसुङ फाइनलमा पुगेपछि अनुले रिपाचे खेल्ने अवसर पाएकी हुन् । एसियाली खेलकुदको १० औं दिनसम्म आइपुग्दा कुनै दुई खेलमा जित हात पार्ने अनु पहिलो नेपाली खेलाडी बनिन् । सियाउसुङले उक्त स्पर्धाको स्वर्ण पदक जितिन् ।
बक्सिङको पुरुष ७५ केजीमा १२ औं सागका कांस्य विजेता दीपक श्रेष्ठलाई ताइपेईंका चियावेइ कानले ५–० ले पराजित गरे ।
टेबलटेनिस :
टेबलटेनिसको पुरुष÷महिला दुवैको टिम इभेन्टमा नेपालको पराजय यात्रा जारी छ । पुरुषमा नेपाल दक्षिण कोरियासंग ३–० ले पराजित हुँदा लाओसलाई ३–१ ले पराजित गरेको थियो । महिलामा नेपाललाई हङकङ र भियतनामले समान ३–० को नतिजामा हराए ।
सेपाकताक्रो :
एसियाली खेलकुदमा पहिलो पटक सहभागिता जनाएको सेपाकताक्रोको पुरुष रेगु स्पर्धामा नेपालको चुनौती समाप्त भएको छ ।
सोमबार नेपाल भारतसंग २–० ले पराजित भयो । त्यसअघि नेपाल चीन, मलेसिया र दक्षिण कोरियासंग पनि समान २–० को नतिजामा पराजित भएको थियो । नेपालले मंगलबार पुरुष क्वाड स्पर्धामा प्रतिस्पर्धा गर्नेछ ।
प्लाराग्लाइडिङ :
प्याराग्लाइडिङको टिम क्रस कन्ट्री इभेन्टको तेश्रो चरण समाप्तिसम्म नेपाली पुरुष टिम चौथो स्थानमा छ । नेपाल अघिल्ले दिन तेस्रो स्थानमा थियो । आयोजक इन्डोनेसिया, जापान र दक्षिण कोरिया क्रमशः शीर्ष तीन स्थानमा छन् ।
सोही स्पर्धाको महिलामा भने नेपाल पाँचौंबाट छैटौं स्थानमा झरेको छ । जापान पहिलो, दक्षिण कोरिया दोश्रो र इन्डोनेसिया तेश्रोमा छन् । पाँचौं चरणसम्म हुने प्रतिस्पर्धा बुधबार सम्पन्न हुनेछ ।
स्क्वास :
नेपालले एसियाडमा सहभागिता जनाउने २९ खेल मध्ये अन्तिममा समावेश भएको स्क्वासको पुरुष टिम इभेन्टमा नेपाल पराजित भएको छ ।
नेपाल दक्षिण कोरिया र पाकिस्तानसंग समान ३–० को नजितमा पराजित भयो । पुरुष सिंगल्समा भने नेपालको चुनौती समाप्त भइसकेको छ ।
