एजेन्सी । आर्सनलका स्टार मेसुट ओजिटलले फुटबल समर्थकलाई सुरक्षित रहन आग्रह गरेका छन् । महामारीको रुपमा फैलिएको कोरोना भाईरसको संक्रमणबाट बच्न ओजिलले फुटबल समर्थकलाई आग्रह गरेका हुन् ।
मार्च १३ सम्म बेलायतमा ७ सय ९८ जनामा संक्रमण देखिएको छ । आर्सनलका प्रशिक्षक मिकेल आर्टिटामा समेत संक्रमण देखिएको छ । बेलायतमा अहिलेसम्म १० जनाको मृत्यु भएको छ ।
विश्व स्वास्थ्य संगठनले भाईरसबाट १ लाख ३२ हजार संक्रमित रहेको भन्दै ५ हजार मानिसले ज्यान गुमाएको बताएको छ ।
कोरोनाकै प्रभावका कारण खेल तालिका समेत प्रभावित बनेको थियो । विश्व खेलकुदका अधिकांश खेलहरु अहिले स्थगित गरिएका छन् ।
कोरानाले अझै फुटबललाई विशेष रुपमा प्रभावित पारेको देखिन्छ । प्रियिमर लिग कम्तिमा अप्रिलसम्मका लागि स्थगित गरिएको छ । यस्तै युरोपेली फुटबल महासंघले अर्को हप्ताका लागि तय भएको च्याम्पियन्स लिग र युरोपा लिगको तालिका स्थगित गरेको छ ।
सिरि ए, ला लिगा, बुन्डेशलिगा र लिग वान सहित युरोपका पाँच ठुला लिग खेल अनिश्चित कालका लागि स्थगित गरिएको छ ।
अझै यस सिजन पुरै खेल हुनेमा आशंका जारी छ । ओजिलले वर्तमान अवस्थामा जोड दिदै आफ्नो ध्यान दिन सबैमा आग्रह गरेका छन् ।
'फुटबलले अहिले अर्थ राख्दैन । मानिसको स्वास्थ्य सबै भन्दा महत्वपुर्ण छ । सक्ने सबै विधि अपनाउन जरुरी छ । जो जोखिममा छ, उसले आफ्नो ख्याल राख्न जरुरी छ ।' ओजिलले भनेका छन् ।
'यो अब विश्वव्यापी बिषय बनेको छ । हामी चिकित्सकलाई धन्यवाद दिन बिर्सदैनौ । जसले भाईरसबाट बचाउन सहयोग गरेका छन् । उनीहरु धेरै दबाबमा छन् । जो हाम्रो सम्मान पाउन लायक छन् ।' उनले थपे ।
३१ बर्षका फरवार्ड यस सिजन आर्सनलबाट २३ पटक खेलेका थिए । उनले एक गोल गर्नुका साथै दुई पटक गोलको अवसर सिर्जना गरेका थिए ।
आर्सनललाई अर्को सिजन च्याम्पियन्स लिगमा छनोट हुन कठिन देखिएको छ । क्लब अझै शीर्ष चारको दौडबाट धेरै टाढा छ । आर्सनल पाँचौ स्थानको म्यान्चेष्टर युनाईटेड भन्दा ४ अंकले पछाडी छ ।
