एजेन्सी । युभेन्ट्सले ईटालीका सेन्टर ब्याक डेनियल रुगानीमा कोरोना भाईरसको सक्रमण भेटिएको बताएको छ ।
परिक्षणको क्रममा उनमा कोरोनाको पोजेटिभ संकेत देखिएको भन्दै क्लबले ईटालियन डिफेन्डर भाईरसबाट संक्रमित भएको बताएको हो ।
सिरि ए क्लबले कानुन अनुसार उपचारको सबै प्रक्रिया सुरु गरिएको जानकारी दिएको छ । साथै रुगानीसंग सम्पर्कमा रहेको सबै ब्यक्तिलाई बिशेष निगरानीमा राखिएको जनाएको छ ।
क्लबले २५ बर्षिया रुगानीको अवस्था सुधारोन्मुख रहेको क्लबले बताएको छ ।
कोरोनाकै कारण ईटालीमा अप्रिल ३ सम्म सबै खेल गतिविधि बन्द गरिएको छ ।
रुगानीले यस सिजन युभेन्ट्सबाट ७ खेल खेलेका थिए । बन्द रंगशालामा खेलिएको पछिल्लो खेलमा उनी बैकल्पिक खेलाडीको रुपमा मैदान छिरेका थिए । सो खेल युभेन्ट्सले २–० ले जितेको थियो ।
क्लबले भाईरसबाट सावधानीका लागि अपनाउनुपर्ने सबै प्रक्रिया अघि बढाएको समेत जनाएको छ ।
रुगानीले युभेन्ट्सबाट चार सिरि एको उपाधि जितेका छन् । उनले ईटालीबाट ७ पटक खेलेका छन् ।
आईतबार उनले ड्रेसिङ रुममा ईन्टरबिरुद्धको खेलको जितमा खेलाडीले खुसी मनाएको फोटो पोस्ट गरेका थिए ।
बुधबार मात्र ईटालीको सरकारले फैलदो संक्रमणलाई ध्यानमा राखेर सबै खेलकुद गतिविधि स्थगित गरेको थियो ।
ईटालीमा कोरोनाका १२ हजार संक्रमित देखिएका छन् । जसमा ८ सय २७ जनाको मृत्यु भएको छ ।
