काठमाडौं । इन्डोनेसियामा जारी एसियन गेम्स अन्तर्गत मंगलबार भएको पुरुष फुटबलमा नेपालले सुधारिएको प्रदर्शन गरेको छ ।
अघिल्ला एसियन गेम्सको तुलनामा उत्कृष्ट खेल पस्किएपनि नेपाल जापानसंग १ – ० गोल अन्तरले पराजित भयो ।
विबावा मुक्ति रंगशालामा नेपालले सुरुवाती आठौं मिनेटमा गोल खाएपनि बाँकी समय जापानी टोलीलाई रोक्न सफल भएको थियो ।
विगतका दिनमा भन्दा उत्कृष्ट खेलेको नेपाली टोलीले एसियाको पावर हाउस जापानसंग डिफेन्सिभ खेलको नमुना प्रस्तुत गरेका थिए । नेपालको डिफेन्सिभ खेल प्रसंसनिय देखिन्थ्यो । त्यसैले नेपाली टिमले जापानलाई धेरै गोल हान्ने कुनै मौका दिएन ।
तुलनात्मक कमजोर टिम नेपालविरुद्ध एक पक्षीय खेल खेलेको जापानले बारम्बार गोल गर्ने अवसर समेत सिर्जना गरेको थियो । तर, नेपाली टिमका गोलरक्षक तथा कप्तान किरण चेम्जोङ बाधक बनेका थिए ।
एसियन गेम्समा चिरपरिचित प्रतिद्वन्द्वी जापानसंग नेपालको यो चौथो हार हो । एसियन गेम्सको अघिल्ला तीन खेलमा समेत नेपाल पराजित भएको थियो । जापानविरुद्धको अघिल्ला तीन खेलमा पनि गोल गर्न नसकेको नेपालले १४ गोल खाएको थियो ।
एसियन गेम्समा नेपालले पहिलो पटक जापानसंग सन् १९८६ मा खेलेको थियो । दक्षिण कोरियामा भएको उक्त खेलमा नेपाल ५–० गोल अन्तरले पराजित भएको थियो । यस्तै सन् १९९८ मा थाइल्याण्डको राजधानी बैँककमा भएको एसियन गेम्समा नेपालले ५–० ले नतिजा जापानलाई सुम्पिएको थियो ।
सन् २०१४ मा दक्षिण कोरियामा भएको एसियन गेम्समा नेपाल जापानसंग ४–० ले पराजित भएको थियो । चौथो भेटमा भने नेपालले गोल अन्तर झिनो बनाउन सफल भएको छ ।
नेपालले एसियन गेम्समा जापानी टोलीसंग निकालेको १–० गोलको झिनो नतिजा नेपालको पहिलो भने हैन । नेपाली टिमले यसअघि पनि धेरै पटक १–० को नतिजाले हार बेहोरेको छ ।
नेपालले यसअघि सन् १९८६ मा दक्षिण कोरियामा भयको एसियन गेम्समा बङ्गलादेशसंग १–० को हार बेहोरेको थियो । यस्तै जापानमा सन् १९९४ मा भएको एसियन गेम्समा नेपाल ओमानसंग १–० गोल अन्तरमा नै पराजित भएको थियो ।
त्यस्तै सन् १९९८ मा थाइल्याण्डमा भएको एसियन गेम्समा पनि नेपाल भारतसंग १ – ० गोल अन्तरले नै पराजित भएको थियो ।
