ग्लाेबल छनाेटकाे लक्ष्य - नेपाल र सिंगापुर भिड्दै

काठमाडौं । आईसीसी टी–ट्वान्टी विश्वकप छनोट अन्तर्गत एसिया फाईनलको अन्तिम खेलमा आज (आईतबार) नेपालले सिंगापुरसंग प्रतिस्पर्धा गर्दैछ ।

विश्वकपको ग्लोबल छनोटमा पुग्न दुवैका लागि अन्तिम खेल महत्वपुर्ण छ । नेपाल र सिंगापुर अन्तिम खेलमा जित निकाल्दै अघिल्लो चरणमा प्रवेश गर्न चाहन्छन् ।

खेल सिंगापुरको ईन्डियन एसोसियसन मैदानमा नेपाली समय अनुसार बिहान सवाँ ७ बजे सुरु हुनेछ ।

अघिल्लो चरण पुग्न नेपाललाई जितको विकल्प छैन । प्रतियोगिताको एक मात्र अपराजित टोली सिंगापुर समेत नेपाललाई निराश बनाउँदै ग्लोबल छनोटमा स्थान बनाउन चाहन्छ ।

खेल बराबरी वा बर्षाले प्रभावित भएको अवस्थामा सिंगापुर अघिल्लो चरण प्रवेश गर्नेछ ।

नेपाल समुह चरणको दोस्रो स्थानमा छ । उसले ३ खेलबाट ४ अंक जोडेको छ ।

शीर्ष स्थानको सिंगापुरको समान खेलबाट ५ अंक छ । कुवेतविरुद्व खेल बर्षाले प्रभावित भएपछि सिंगापुरले अंक बाँडेको थियो । नेपालले पहिलो खेलमा कतारसंग अप्रत्यासित हार ब्यहोरेको थियो ।

हेड टु हेड

हालसम्म नेपाल र सिङ्गापुर ९ पटक आमने सामने भएका छन् । जसमा ३ खेल तीन दिवसीय, २ टी-ट्वान्टी र ४ एक दिवसीय खेल रहेको छन् ।

नेपाल माथि सिंगापुरले कुनै खेलमा पनि जित निकाल्न सकेको छैन । पहिलो पटक सन् २००४ को एसीसी फास्ट ट्र्याक कन्ट्री प्रतियोगितामा तीन दिवसीय खेलमा भएको थियो ।

नेपालले पहिलो पालीमा २ सय ६० र दोस्रो पालीमा २ सय ३ रन बनाएको थियो । सिंगापुरले पहिलो पालीमा २ सय २७ र दोस्रो पालीमा विना कुनै विकेट ८७ रन बनाउँदा खेल बराबरी भएको थियो ।

सन् २००५ को सोही प्रतियोगितामा समेत दुई राष्ट्रले बराबरी खेलेका थिए । नेपालले दुई इनिङसमा दिएको लक्ष्य पछ्याउने क्रममा सिंगापुरले अन्तिम दिन सम्म न लक्ष्य पूरा गर्यो न नेपालले अल आउट पार्यो ।

सन् २००६ को सोही प्रतियोगितामा भने नेपालले जित हात पारेकाे थियाे । पहिलो पालीमा ९ विकेट गुमाएर ३ सय १३ बनाएको नेपालले दोस्रो पालीमा ६ विकेट गुमाउँदै १ सय ७६ रन बनाएकाे थियो ।

सिंगापुर पहिलो पालीमा ९० तथा दोस्रो पालीमा १ सय ९६ मा अलआउट हुँदा नेपाल २ सय ५ रनले विजयी भएको थियो ।

सन् २००९ को एसीसी टी ट्वान्टी कपमा सिंगापुरले दिएको ९० रनको सामान्य लक्ष्य नेपालले १४ ओभर २ बलमा १ विकेट गुमाएर पुरा गरेका थियाे ।

सन् २०१० को डिभिजन ५ मा नेपालले सिंगापुर लाई १६ रनले पराजित गरेकाे थियाे । नेपालले दिएको १ सय ८१ रनको लक्ष्य पछयाएको सिंगापुर ४७ ओभर ५ बलमा १ सय ६४ रनमा समेटियो ।

सन् २०१२ को डिभिजन ४ मा नेपालले ५ विकेटले विजयी भएको थियो । सिंगापुरले दिएको १ सय १२ रनको सामान्य लक्ष्य नेपालले २४ ओभर ५ बलमा ५ विकेट गुमाएर पुरा गर्यो ।

सन् २०१४ को एसियन गेम्समा नेपालले दिएको २ सय ६४ रनको लक्ष्य पछ्याएको सिंगापुर २१ ओभर ४ बलमा मात्र ७३ रनमा समेटियो ।

र नेपाल १ सय ९० रनको भारी अन्तरले विजयी भयो ।

सन् २०१८ को एसिया कप छनोटमा नेपलले सिंगापुरले ४ विकेटले जित हात पारेकाे थियाे । सिंगापुरले दिएको १ सय ५२ रनको लक्ष्य नेपालले २८ ओभर १ बलमा ६ विकेट गुमाएर पुरा गर्यो । अन्तिम पटक नेपाल र सिंगापुर टी-ट्वान्टी विश्वकप एसिया पूर्वी क्षेत्रिय छनोटमा भेट भएको थियो ।

अन्तिम खेलमा सिंगापुरले दिएको ८२ रनको लक्ष्य पछ्याएको नेपालले ३ बलमा १ विकेट गुमाएर १ रन बनाउँदा पानीले खेल प्रभावित भएको थियो ।