काठमाडौं । ओप्स टु ‘ए’ साइड पुरुष तथा महिला भलिबल प्रतियोगिता भोली सुरु हुने भएको छ । आयोजक ढोरपटन क्लबले मंगलबार काठमाडौंमा पत्रकार सम्मेलन गर्दै प्रतियोगिताको सम्पूर्ण तयारी पूरा भएको जानकारी दिएको छ ।
गोङ्गबु नयाँ बसपार्कस्थित ढारपाटन क्लबको खेल मैदानमा हुने प्रतियोगिता असोज १३ गतेसम्म चल्नेछ । नकआउटका आधारमा हुने प्रतियोगितामा पुरुषतर्फ ३२ टोलीको सहभागिता रहेको क्लबका अध्यक्ष मनवीर छन्त्यालले बताए ।
प्रतियोगितामा अन्तर्राष्ट्रिय प्रतियोगिता खेलेका राष्ट्रिय खेलाडीले जोडी बनाएर खेल्न पाउने छैनन् । महिलातर्फ बुधबारमात्रै सहभगी टोलीको टुङ्गो लाग्ने आयोजकले जनाएको छ ।
यस्तै आयोजक क्लबले मुख्य प्रायोजक अर्गानाइजेसन अफ प्राइभेट स्कुल (ओप्स) सँग सम्झौता हस्ताक्षर गरेको छ । सम्झौतामा क्लबका अध्यक्ष मनवीर छन्त्याल र ओप्सका अध्यक्ष लोकेन्द्र बहादुर खड्काले हस्ताक्षर गरे ।
सम्झौता अनुसार ओप्सले प्रतियोगितालाई १ लाख २० हजार उपलब्ध गराउनेछ । सम्झौतापछि ओप्सका अध्यक्ष लोकेन्द्र खड्काले ओप्स अध्ययनसँग अतिरिक्त क्रियाकलाप विशेषगरी खेलकुदमा सक्रिय रहेको बताए ।
प्रतियोगिताको पुरुषतर्फको विजेताले ४० हजार रुपैया प्राप्त गर्नेछ । दोस्रो हुनेले २० हजार तथा तेस्रो हुनेले ५ हजार प्राप्त गर्ने आयोजकले जनाएको छ ।
महिलातर्फको विजेताले २० हजार, उपविजेताले १० हजार र तेस्रो हुनेले ५ हजार पाउनेछ । टिकट काटेर खेल हेर्न आउने एक उत्कृष्ट दर्शकले एक थान युएम मोटरसाइकल प्राप्त गर्नेछ ।
प्रतियोगिता सञ्चालनका लागि करिव २ लाख ५० हजार खर्च हुने आयोजकले अनुमान गरेको छ ।
-1752288200.webp)
