नेपालगन्ज । बाँकेमा जनस्तरबाट पहिलो पटक लुम्बिनी प्रदेशस्तरीय पौडी प्रतियोगिता सम्पन्न भएको छ ।
नेपालगन्ज स्वीमिङ क्लबले शनिवार नेपालगन्ज रंगशाला परिसरमा आयोजित पौडी प्रतियोगिताको ५० मिटरको खुल्ला पुरुषतर्फको बटरफ्लाईमा नेपालगन्जका अमित रावलले स्वर्ण, दाङका सुवेश पाण्डेले रजत र नेपाली सेनाका भुवन बोटेले काँस्य पदक प्राप्त गरे ।
यस्तै ५० मिटरकै खुल्ला पुरुष फ्रिस्टाइलमा दाङका सुवास पाण्डेले स्वर्ण, नेपाली सेनाका भुवन बोटेले रजत र नेपालगन्जका अमित रावलले काँस्य पदक प्राप्त गरे ।
महिलाको ५० मिटर खुल्ला फ्रिस्टाइलमा सुप्रिया रावलले स्वर्ण, डा. महिमा शाहले रजत र जमुना डाँगीले कास्य पदक प्राप्त गरे । सोही अनुसार १५ वर्ष मुनिका बालिकाको ५० मिटर फ्रिस्टाइलमा जमुना डाँगीले स्वर्ण, संस्कृति अधिकारीले रजत र कश्बी गुरुंगले काँस्य पदक जिते ।
यस्तै १४ वर्षमुनिका बालकको ५० मिटर फ्रिस्टाइलमा अनमोल केसीले स्वर्ण, श्यामुल सुनारले रजत र उज्वल क्षेत्रीले कास्य पदक प्राप्त गरे । सोही प्रकारले १२ वर्षमुनिका बालकको ५० मिटर फ्रिस्टाइलमा इभान्सु भट्टराईले स्वर्ण, प्रज्वल रानाले रजत र सिजन थापाले कास्य पदक प्राप्त गरे ।
१२ वर्षमुनिका बालिकको ५० मिटर फ्रिस्टाइलमा सारिकाले स्वर्ण र आरोशी डिसीले रजत पदक प्राप्त गरे । १० वर्षमुनिका बालकको २५ मिटर फ्रिस्टाइलमा सुशान्त बोहोराले स्वर्ण, बसन्त थारुले रजत र मनन् शर्माले कास्य पदक जिते ।
यस्तै १० वर्षमुनिका बालिकाको २५ मिटर फ्रिस्टाइलमा सम्बृद्धि न्यौपानेले स्वर्ण र प्रिसेस जिसिले रजत पदक जिते । ८ वर्षमुनिका बालकको २५ मिटर फ्रिस्टाइलमा संस्कार न्यौपानेले स्वर्ण, सुमित वाग्लेले रजत र रिजन बोहोराले कास्य पदक जिते ।
पदक विजेता खेलाडीहरुलाई नेपाल पौडी संघका केन्द्रीय अध्यक्ष अशोक बज्राचार्य, लुम्बिनी प्रदेश खेलकुद परिषद्का सदस्य सचिव जय भट्टराई, राष्ट्रिय खेलकुद परिषद्का सदस्य दिपेन्द्र विष्ट, नेपालगन्ज उपमहानगरका नगर प्रमुख प्रशान्त विष्ट लगायतले पुरस्कृत गरेका थिए ।
८ वर्षदेखि १५ वर्ष उमेर समूह र खुलातर्फ २५ मिटर र ५० मिटरका फ्रिस्टाइल, बटरफ्लाइ विधा गरि ९ वटा स्पर्धामा बाँके, बर्दिया, दाङ, रुपन्देही, गुल्मी र नवलपरासीका ५२ जना खेलाडीले प्रतिस्पर्धा गरेका थिए । मेडल जित्ने अधिकांश बाँकेका छन् ।
त्यसैगरी नेपालगन्ज स्वीमिङ क्लबले खेल क्षेत्रमा योगदान दिने तीन जनालाई सम्मान गरेको छ । क्लबले ट्रायथलनका अफिसियल चाहाना शाह, पौडीका अफिसियल विष्णु खड्का र पौडी प्रशिक्षक दीपक परियारलाई सम्मान गरेको छ ।
