काठमाडौं । अजिमा स्नुकर हाउसका रेन्जेन लामाले प्रथम चक्र लामा÷किसन लामा स्मृति राष्ट्रव्यापी खुला स्नुकर प्रतियोगितामा आइतबार संघर्षपूर्ण जित हात पारेका छन् ।
रेन्जेनले ब्रेक प्वाइन्टका शिव थापा मगरमाथि ४–३ को कठिन जित दर्ता गरे । ‘बेस्ट अफ सेभेन’ को तेश्रो चरणको खेलमा रेन्जेनले लगातार तीन फ्रेम गुमाएका थिए ।
त्यसपछिको खेलमा पुनरागमन गर्दै रेन्जेनले लगातार ४ फ्रेमको नतिजा आफ्नो पक्षमा पार्दै अघिल्लो चरणमा स्थान सुरक्षित गर्न सफल भए । तेश्रो चरणको खेल आइतबारदेखि सुरु भएको हो ।
त्यस्तै लास्ट ब्रेकका सनोज खड्गीले अजिमाका दोर्जे शेर्पालाई ४–२, चामुण्डाका तेन्जिङ लामाले लास्ट ब्रेकका उदिप शाक्यलाई ४–२, अजिमाका नेपाल नम्बर वान रेगन श्रेष्ठले एन्जीका रितेश देउलालाई ४–१ ले हराए ।
यस्तै ब्रेक प्वाइन्टका सञ्जय वज्राचार्यले लास्ट ब्रेकका आयुश गौतमलाई ४–१ तथा माउन्ट एभरेष्टका कृतेश ज्ञवालीले कुमारी स्नुकरका पदम तामाङलाई ४–० को फ्रेममा पराजित गरे ।
