काठमाडौं । प्रधानसेनापति खुला म्याराथनको उपाधि त्रिभुवन आर्मी क्लबका राजन रोकायाले जितेका छन् ।
जंगीअड्डा भद्रकालीमा शनिबार भएको म्याराथनमा राजनले निर्धारित दुरी २ घन्टा २० मिनेट ०८ सेकेन्डमा पूरा गर्दै च्याम्पियन बनेका हुन् ।
उपाधिसँगै राजनले ३ लाख नगद पुरस्कार र यामाहाको मोटरसाइकल प्राप्त गरे ।
आर्मीकै खडक बहादुर खड्काले २ घन्टा २१ मिनेट ४३ सेकेन्डको समय निकाल्दै दोस्रो स्थान हासिल गरे ।
आर्मीका कृष्ण बहादुर बस्नेतले २ घन्टा २२ मिनेट २२ सेकेन्डमा दौड पूरा गर्दै तेस्रो स्थान हासिल गरे ।
दोस्रो भएका खडकले २ लाख र तेस्रो भएका कृष्णले १ लाख प्राप्त गरे ।
हाफ म्याराथनको महिलातर्फ नेपाल पुलिस क्लबकी राजपुरा पछाई र पुरुषमा आर्मीका दीपक अधिकारीले उपाधि जिते ।
राजपुराले निर्धारित दुरी १ घन्टा १४ मिनेट ३४ सेकेन्डमा पूरा गरिन् ।
महिलातर्फ आर्मीकी पूर्णलक्ष्मी न्यौपाने दोस्रो र आर्मीकै निर्मला केसीले तेस्रो स्थान हासिल गरिन् ।
पुरुषको उपाधि जित्ने क्रममा दीपकले १ घन्टा ४ मिनेट ०६ सेकेन्डमा दौड पूरा गरे । आर्मीकै मुकेश पाल दोस्रो र तीर्थ पुन तेस्रो भए ।
हाफ म्याराथन पुरुष र महिला दुवैतर्फ विजेताले समान ७५ हजार, दोस्राले ५० हजार र तेस्राले ३५ हजार प्राप्त गरे । महिलाको विजेताले इलेक्ट्रिक स्कुटर पनि प्राप्त गरे ।
सैनिक अधिकृत १० किलो मिटर दौडको पुरुषमा सुरज ऐडी पहिलो भए । विशाल चन्द्र वाजी दोस्रो र जिलेस्पी जंग कार्की तेस्रो भए ।
यसै स्पर्धाको महिलातर्फ अस्मिता जिसी पहिलो भईन् । दुर्गा केसी दोस्रो र गिता गुरुङ तेस्रो भइन् ।
१० किमी छात्रामा सोनु घतानी, साधना श्रेष्ठ र मनीषा गिरी शीर्ष तीनमा रहदा छात्रमा विकेश घिमिरे, प्रज्वल श्रेष्ठ र सुशिल बोहराले शीर्ष तीन स्थान हासिल गरे ।
नेपाली सेनाले महाशिवरात्री र सेना दिवसको अवसरमा म्याराथन प्रतियोगिता आयोजना गरेको हो ।
-1746755007.webp)
