काठमाडौं । नेपाल खेलकुद महासंघमा अध्यक्ष केपी ओली पक्षको समानान्तर कमिटि बन्ने भएको छ ।
एमालेभित्रको अन्तरविरोध चर्किदै जादाँ पाटी अध्यक्ष ओली पक्षले खेलकुद महासंघमा समानान्तर कमिटि गठन गर्ने भएका हुन् ।
युवा संघका पूर्व अध्यक्ष रमेश पौडेललाई संयोजक बनाएर अघि बढ्ने सहमती सहित ओली पक्षले बैशाख ७ गते काठमाडौंमा राष्ट्रिय भेला गर्दैछ ।
महासंघको राष्ट्रिय भेलालाई प्रधानमन्त्री केपी ओलीले सम्बोधन गर्ने गरि कार्यक्रमको तयारी अन्तिम चरणमा पुगेको छ ।
एमालेको नेपाल खेलकुद महासंघमा माधव नेपाल र झलनाथ खनालको समुह हाबी छ । महासंघको नेतृत्व सहित अधिकांश कार्यसमितिमा माधव–झलनाथ समुहका नेता रहेका छन् ।
विभाजन उन्मुख देखिएको एमालेमा माधव–झलनाथ समुहलाई चुनौती गर्दै ओलीले खेलकुद महासंघमा समानान्तरक कमिटि गर्न लागेका हुन् । ओली पक्षले महासंघको संयोजकमा रमेश पौडेललाई संयोजक बनाएर जाने गरि तयारी गरेको छ ।
एमालेको खेलकुद महासंघमा ओली पक्ष निकै कमजोर छ । महासंघको तत्कालिन ८६ सदस्यीय कमिटिमा ओली पक्षका नगन्य सदस्यमात्र थिए ।
पाटीको आन्तरिक अन्तरविरोध तिव्र बनेपछि झलानाथ–नेपाल समुह समानान्तर कमिटि बनाएर अघि बढ्ने अभियानमा छन् ।
खेलकुद महासंघ झलनाथ–नेपाल समुहको कब्जामा गएपछि ओलीलाई समेत समानान्तर कमिटि गठनका लागि दबाब परेको हो । सोही अनुसार बैशाख ७ गते काठमाडौंमा राष्ट्रिय भेलाको आयोजना गरिएको छ । भेलाले रमेश पौडेलको नेतृत्वमा महासंघको नयाँ कमिटिको घोषणा गर्ने तयारी छ ।
ओली पक्षको महासंघमा पौडेल सहित युवा संघका नेता पर्शुराम बस्नेत, खेलकुद महासंघका नेता मेघराज पौडेल, राखेप बोर्ड सदस्य सुभास श्रेष्ठ, राखेपका अधिकांश बोर्ड सदस्य सहित खेलकुदका ओली पक्षिय नेता रहने बताईएको छ ।
खेलकुद महासंघमा ओली पक्ष निकै कमजोर हो । मेघराज पौडेल सहितका केही सिमित नेताले महासंघबाट खेलकुदको राजनीतिक गर्दै आएका थिए ।
ओली आफै कमजोर रहेको महासंघमा जोड दिएका थिएनन् । उनले मदन भण्डारी फाउण्डेशन अन्तर्गत मदन भण्डारी स्पोर्टस एकेडेमीलाई अघि बढाउँदै आएका थिए ।
स्पोर्टस एकेडेमीका संस्थापक अध्यक्ष रमेशकुमार सिलवाल हुन् । उनै सिलवाललाई ओलीले राखेपमा दोस्रो पदक सदस्य सचिवको रुपमा नियुक्ति दिएका छन् ।
सिलवालले खेलकुदमा ओलीको लिगेसी बोक्दै राखेप हाँक्दै आईरहेका छन् । ओलीले तत्कालिन समयमा खेलकुद महासंघका नेता मेघराज पौडेललाई बाहिर राख्दै सिलवाललाई सदस्य सचिव नियुक्त गरेका थिए ।
पाटीको जनवर्गिय संगठन भन्दा ओलीले एनजिओको रुपमा सञ्चालित मदन भण्डारी स्पोर्टस एकेडेमीलाई महत्व दिएको भन्दै खेलकुद महासंघमा ओली पक्षिय नेताले असन्तुष्टि ब्यक्त गर्दै आएका थिए । पाटीमा माधव नेपाल समुहसंग अन्तरविरोध बढेपछि ओलीले युवा संघका नेताहरुलाई समावेश गर्दै खेलकुद महासंघको समानान्तर कमिटि गठन गर्न लागेका हुन् ।
झलनाथ–माधव समुहले हप्ता दिन अघि मात्र काठमाडौंमा खेलकुद महासंघको राष्ट्रिय भेला आयोजना गरेको थियो । भेलाले केन्द्रिय कमिटि विस्तारै गर्दै जिम्मेवारी हेरफेर गरेको थियो । महासंघको वर्तमान नेतृत्वमा पुरुषोत्तम पौडेल रहेका छन् । उनी एमालेको आठौं महाधिवेशनको समय नेतृत्वमा आएका थिए ।
महासंघको नेतृत्वको हैसियतमा उनी खेलकुद मन्त्री समेत बने । केपी ओलीसंग विवाद बढेपछि उनी पदबाट बाहिरिएका थिए । महासंघकै उपाध्यक्षको रुपमा केशवकुमार विष्टलाई मन्त्री पौडेलले राखेपको सदस्य सचिवमा नियुक्त गरेका थिए । आफुसंग सल्लाह नगरि सदस्य सचिव नियुक्त गरिएको भन्दै ओलीले मन्त्री पौडेललाई पदबाट बर्खास्त गरेका थिए ।
