काठमाडौं । सरकारले फुटसल सहित खेलकुद तथा मनोरञ्जन केन्द्रको पूर्वाधार निर्माण तथा सञ्चालनको मापदण्ड बनाउन निर्देशन दिएको छ ।
युवा तथा खेलकुद मन्त्रालयले नयाँ ऐन अनुसार फुटसल, पौडीपोखरी, जीम जस्ता खेलकुद तथा मनोरञ्जन केन्द्रको सञ्चालनका लागि मापदण्ड तयार गर्न राष्ट्रिय खेलकुद परिषद् (राखेप)लाई निर्देशन दिएको हो ।
पछिल्लो समय शहर बजारमा फुटसल, पौडीपोखरी र जीमको व्यवसाय फस्टाएको छ । तर सो व्यवसाय सरकारको कानुनी दायरा बाहिर रहेको थियो । फुटसल, पौडी र जीम सञ्चालनको नियमन गर्ने कानुनसमेत सरकारसंग थिएन ।
तर नयाँ खेलकुद विकास ऐनले फुटसल, पौडीपोखरी, जीम जस्ता खेलकुद सञ्चालनको मापदण्ड बनाउने व्यवस्था गरेको हो ।
राष्ट्रिय खेलकुद विकास ऐन २०७७ को दफा ९ को ण अनुसार नीजि क्षेत्रबाट सञ्चालन हुने फुटसल, पौडीपोखरी, जीम जस्ता खेलकुद तथा मनोरञ्जन केन्द्रको पूर्वाधार निर्माण एवं सञ्चालन गर्न मापदण्डन निर्धारण लागि मन्त्रालयमा सिफारिस गर्ने प्रावधान उल्लेख छ ।
सोही प्रावधान अनुसार मन्त्रालयले फुटसल लगायतका खेल सञ्चालनको मापदण्ड बनाउन र नियमनको सहजीकरणका लागि राखेपलाई पत्राचार गरेको हो ।
‘फुटसल, पौडीपोखरी र जीममा सरकारले अनुगमन गर्ने गरेको छैन । यसअघि कसैले पनि गरेको थिएन । कानुन पनि थिएन ।’ मन्त्रालयका एक अधिकारीले भने, ‘तर नयाँ ऐनले मापदण्ड बनाएर अनुगमनको व्यवस्था गरेको छ । सोही अनुसार फुटसल लगायतका व्यवसाय सञ्चालनको मापदण्ड र नियमन आवश्यक देखिएको छ ।’
सरकारको मापदण्ड र नियमन नहुँदा फुटसल, पौडी र जीममा व्यवसायीको मनोमानी छ । व्यवसायीले आफु खुसी सर्वसाधारणबाट शुल्क उठाउने गरेका छन् ।
सरकारले अब फुटसल लगायतका खेललाई समेत कानुनी दायमा ल्याउन पहल थालेको हो । सोही अनुसार राखेपलाई मापदण्ड र अनुगमनको सहजीकरणका लागि मन्त्रालयले निर्देशन दिएको छ ।
फुटसल पछिल्लो समय शहर बजारमा लोकप्रिय छ । सरकारको अनुगमन नपुगेपनि देशभर करोडौको लगानीमा फुटसल सेन्टर निर्माण हुने क्रम बढेको छ । अहिलेपनि झण्डै सयको हाराहारीमा फुटसल सेन्टरहरु देशभित्र निर्माण भएका छन् । व्यवसायीले अवौंको लगानी गरेका छन् ।
बुधबारमात्र फुटसल व्यवसायी संघले लकडाउनले आफ्नो व्यवसाय धरासायी बनेको भन्दै सरकारको अनुमती बेगरनै फुटसल सञ्चालन गर्ने निर्णय गरेका थिए ।
सुरक्षित तरिकाले व्यवसाय सञ्चालन गर्ने अनुमती माग्दा सरकारले वेवास्ता गरेको उल्लेख गर्दै संघले शुक्रबारबाट फुटसल सेन्टरहरु सञ्चालन गर्ने निर्णय गरेका हुन् ।
