एजेन्सी । चेल्सी र लिभरपुल एफ ए कपको फाईनलमा आज (शनिबार) राति भिड्दैछन् । वेम्बली रंगशालामा हुने खेल नेपाली समय अनुसार राति पौने १० बजे सुरु हुनेछ ।
लिभरपुलले यसै सिजन कारबाओ कपको फाईनलमा चेल्सीलाई गत फेब्रुअरीमा हराएको थियो । च्याम्पियन्स लिग फुटबलको फाईनल पुगेको लिभरपुल सिजनको दोस्रो उपाधिको नजिक छ । लिभरपुल प्रिमियर लिगमा शीर्ष स्थानको म्यानचेस्टर सिटी भन्दा मात्र ३ अंकले पछि छ । लिगमा दुई खेल मात्र बाँकी छ ।
८ पटकको एफ ए कप विजेता चेल्सी लगातार तेस्रो सिजन प्रतियोगिताको फाईनल पुगेको हो । पछिल्लो ६ मध्य ५ सिजन चेल्सीले फाईनल खेलेको छ । सन् २०२० मा फ्राङ्क लम्पार्डको नेतृत्वमा आर्सनलसँग र सन् २०२१ मा थोमस टुचेलको नेतृत्वमा लेस्टर सिटीविरुद्ध खेलेको चेल्सी उपविजेतामा सिमित बनेको थियो ।
‘यो अर्को कठिन लडाई हुनेछ । लयमा रहेको लिभरपुलले कडा चुनौती दिनेछ ।’ चेल्सी प्रशिक्षक टुचेलले भने, ‘तर यो उही एक कप फाईनल खेल हो ।’
लिभरपुल सन् २०१२ पछि पहिलो पटक फाईनल खेल्दैछ । त्यो समय चेल्सीले लिभरपुललाई २–१ ले हराएको थियो । पछिल्लो पटक सन् २००६ मा लिभरपुलले उपाधि जितेपछि चेल्सीले ५ पटक एफ ए कपको उपाधि उचालेको छ ।
‘लिभरपुलका समर्थक यस पटक आफ्नो समय भएको बताउँछन् ।’ लिभरपुल प्रशिक्षक योर्गेन क्लोप भन्छन्, ‘म यसलाई धेरै प्रेम गर्छु । तर नतिजाका बिषयमा कुनैपनि ब्यक्तिले ठोकुवा गर्न सक्दैन ।’
एफ ए कप विश्वको लामो नकआउट प्रतियोगिता हो । यसले आफ्नो १ सय ५० औं वार्षिकोत्सव मनाउँदैछ । यसको सुरुवात सन् १८७१÷७२ को सिजनबाट भएको हो ।
