काठमाडौं । कतारमा आयोजना हुने फिफा विश्वकप छनोटमा ब्राजिलले इक्वेडरसँग बराबरी खेलेको छ ।
दक्षिण अमेरिकी छनोट अन्तर्गत शुक्रबार ब्राजिलले इक्वेडरसँग १-१ गोलको बराबरी खेलेको हो ।
खेलको छैटौं मिनेटमा क्यासिमिरोले गोल गर्दै ब्राजिललाई अग्रता दिलाएका थिए ।
१५ औं मिनेटमा एलेक्सजेण्डर डोमिनगुएजले रातो कार्ड पाएपछि इक्वेडर १० खेलाडीमा समेटियो ।
खेलको २० औं मिनेटमा इमर्सन रोयलले रातो कार्ड पाएपछि ब्राजिल पनि १० खेलाडीमा सिमित भयो ।
त्यसपछि खेलको ७५ औं मिनेटमा इक्वेडरका फेलिक्स टोरेसले गोल गरेपछि खेल १-१ को बराबरीमा सकियो ।
यस बराबरीसँगै ब्राजिलले १४ खेलमा ३६ अंक जोडेको छ ।
विश्वकपमा छनोट भईसकेको ब्राजिल शीर्ष स्थानमा रहेको छ ।
इक्वेडर २४ अंक जोडेर तेस्रो स्थानमा रहेको छ ।
छनोट अन्तर्गत नै उरुग्वेले पाराग्वेलाई १-० ले हराएको छ ।
उरुग्वेको जितमा लुइस सुआरेजले ५० औं मिनेटमा निर्णायक गोल गरे ।
उरुग्वे १९ अंक जोडेर चौंथो स्थानमा रहेको छ ।
पाराग्वे १३ अंक जोडेर नवौं स्थानमा रहेको छ ।